शेतकर्यांच्या जीवनात बैल पोळ्याचे मोठे महत्त्व : माजी मंत्री थोरात
नायक वृत्तसेवा, संगमनेर
भारत हा कृषिप्रधान देश असून शेतकर्यांचे पशुधन हे त्याचे सर्वस्व असते. पशुधनावर प्रेम करणारा शेतकरी हा सर्वांचा पोशिंदा असून त्यांच्या जीवनामध्ये बैलपोळ्याचे महत्त्व मोठे असल्याचे गौरवोद्गार माजी मंत्री बाळासाहेब थोरात यांनी काढले.
माजी मंत्री बाळासाहेब थोरात यांच्या तालुक्यातील जोर्वे येथील संत सावली या निवासस्थानी पारंपारिक पद्धतीने बैल पोळा मोठ्या उत्साहात साजरा करण्यात आला. यावेळी सौ.कांचनताई थोरात, कॅन्सर तज्ञ डॉ. जयश्री थोरात यांच्यासह जोर्वे येथील ग्रामस्थ व थोरात परिवार उपस्थित होता. लहान थोरांमध्ये या सणाबाबत मोठा उत्साह असतो. काळानुसार या सणांमध्ये बदल जरी झाला तरी बैलपोळ्याचे महत्त्व अनन्य साधारण आहे. कृषी औद्योगिक क्रांतीच्या धोरणानंतर सध्या सर्वत्र ट्रॅक्टरच्या माध्यमातून शेती केली जात आहे. अशा यांत्रिक युगातही शेतकर्यांचे पशुधनावरील प्रेम कायम आहे. शेतकरी कुटुंबामध्ये गाई, बैल दारासमोर असणे ही मोठी प्रतिष्ठा असते. मात्र सध्या शेतकरी मोठ्या अडचणीत असून त्यांच्या शेतीमालाला भाव नसतो. शेतकर्यांच्या शेतीमालाला हमीभाव मिळाला पाहिजे ही आमची सातत्याने मागणी असून या सरकारने शेतकर्यांची पूर्ण कर्जमाफी केली पाहिजे. अडचणीच्या काळामध्ये शेतकर्यांच्या पाठीशी उभे राहणे ही सरकारची जबाबदारी आहे.
आपण राज्याचे कृषिमंत्री पद सहा वर्षे सांभाळले असून शेतकर्यांना कायम मदतीची भूमिका घेतली. कृषिमंत्री पदाच्या माध्यमातून राज्यातील तमाम शेतकरी बांधवांची सेवा करण्याची संधी मिळाली, या संधीचा उपयोग हा राज्यातील शेतकर्यांसाठी केला असून शेतकर्याला सरकारने मदत केली पाहिजे हा आपला कायम आग्रह राहिला आहे. याचबरोबर ज्या भागांमध्ये पाऊस नाही त्या भागामध्ये चांगला पाऊस होऊन शेतीमध्ये समृद्धी निर्माण व्हावी अशी प्रार्थना ही बाळासाहेब थोरात यांनी केली.यावेळी पारंपारिक पद्धतीने मोठ्या उत्साहात बैल पोळा जोर्वे गावासह सर्वत्र साजरा करण्यात आला.
शेतकरी हा जगाचा पोशिंदा आहे. त्यांच्या जीवनामध्ये पशुधन अत्यंत मोलाचे असते. पुरातन काळापासून शेती कामासाठी बैलाचे मोठे योगदान राहिले आहे. शेतकर्यांचा मोठा जीव बैलामध्ये असून पोळ्याचा दिवस हा त्याचा सन्मान करण्याचा असल्याचे माजी मंत्री बाळासाहेब थोरात यावेळी म्हणाले.
