अननस घेऊन जाणार्‍या ट्रकची दोन कंटेनरला धडक
अननस घेऊन जाणार्‍या ट्रकची दोन कंटेनरला धडक
नायक वृत्तसेवा, घारगाव
संगमनेर तालुक्यातील पुणे-नाशिक राष्ट्रीय महामार्गावर असलेल्या डोळासणे शिवारातील बांबळेवाडी येथे नाशिकला अननस घेवून भरधाव वेगाने जाणार्‍या ट्रकने दोन कंटेनरला पाठीमागून जोराची धडक दिली. यामध्ये कंटेनरमधील चार नवीन कारचेही नुकसान झाले आहे. सदर अपघात सोमवारी (ता.19) पहाटे साडेचार वाजेच्या सुमारास घडला आहे. तर ट्रक चालक किरकोळ जखमी झाला आहे.
याबाबत घारगाव पोलिसांनी दिलेली अधिक माहिती अशी की, ट्रक (क्र.एमएच.50, 2444) हिच्यावरील चालक हा केरळ राज्यातून अननस घेवून आळेफाटा मार्गे नाशिकला जात होता. सोमवारी पहाटे हा ट्रक महामार्गावरील बांबळेवाडी शिवारात आला असता, त्याच दरम्यान महामार्गाच्या कडेला दोन कंटेनर टायरचा पंक्चर काढण्यासाठी थांबले होते. अचानक पाठीमागून भरधाव वेगाने येणार्‍या ट्रकने कंटेनरला जोराची धडक देवून पुन्हा दुसर्‍याही कंटेनरला जोराची धडक दिली. या भीषण अपघातात चालक हा किरकोळ जखमी झाला असून महामार्गाच्या कडेला मोठ्या प्रमाणात अननस पडले होते. तर दोन्ही कंटेनरमध्ये (क्र.एनएल.01, एन.4403 आणि एनएल.01, क्यू.1712) असलेल्या नवीन चार कारचे नुकसान झाले. ट्रकचा पुढचा भाग पूर्णपणे तुटलेल्या अवस्थेत होता. घटनेची माहिती समजताच घारगाव पोलिसांनी घटनास्थळी धाव घेतली. त्यानंतर टोलनाक्याच्या कर्मचार्‍यांनीही घटनास्थळी धाव घेऊन लोखंडी क्रेन आणून महामार्गावर असलेली ट्रक बाजूला घेतली. केवळ आमचे दैवबवत्तर असल्याने आम्ही बालंबाल बचावलो असल्याचेही कंटेनर चालकांनी सांगितले.
