मला आमदार करण्यात पत्रकारांचेही मोठे योगदान : आ.खताळ

व्हॉइस ऑफ मीडिया या आंतरराष्ट्रीय स्तरावरील संघटनेच्या संगमनेर तालुका व शहर कार्यकारिणीच्या वतीने शहरातील अतिथीगृहावर आयोजित कार्यक्रमात आमदार खताळ बोलत होते. आमदार अमोल खताळ यांच्या माध्यमातून पत्रकारांच्या पाल्यांचा शालेय साहित्य देऊन गौरव करण्यात आला.  यावेळी व्यासपीठावर व्हाईस ऑफ मीडियाचे जिल्हाध्यक्ष गोरक्षनाथ मदने, खजिनदार गोरक्षनाथ नेहे, संगमनेर तालुकाध्यक्ष बाबासाहेब कडू, शहराध्यक्ष महेश पगारे, सचिव सचिन जंत्रे, कार्याध्यक्ष भारत रेघाटे, ज्येष्ठ पत्रकार संदीप वाकचौरे, संजय अहिरे संघटनेचे पदाधिकारी आणि पत्रकार बांधव मोठ्या संख्येने उपस्थित होते.

आ.खताळ पुढे म्हणाले की, संगमनेर मधील पत्रकारांची आणि माझी अनेक वर्षांपासूनची मैत्री आहे.  त्यांनी मला येथून मागेही खूप मदत केली आहे. आणि येथून  पुढेही ते नक्कीच मदत करतील अशी मला आशा आहे.  त्यामुळे त्यांच्या पाल्यांना शालेय साहित्य उपलब्ध करून देणे माझे कर्तव्य आहे, म्हणून मी प्रत्येक वर्षी  त्यांच्या मुलांना  शैक्षणिक साहित्य देणार असल्याचे आ.अमोल खताळ यांनी स्पष्ट केले.

पत्रकारांच्या कुटुंबातील मुलं ही समाजाच्या सक्षम भवितव्यासाठीची बीज आहेत. त्यांना प्रोत्साहन देणे ही सामाजिक जबाबदारी असल्याचे  जिल्हाध्यक्ष गोरक्षनाथ मदने यांनी सांगितले. पत्रकार हा समाजाचा आरसा आहे, सामाजिक काम करतांना त्यांच्याकडे आपल्या कुटुंबाला देण्यासाठी फारसा वेळ नसतो. पत्रकारांनी  मुलांच्या उज्वल भवितव्यासाठी  कौटुंबिक जबाबदारी  पार पाडावी असे तालुकाध्यक्ष बाबासाहेब कडू यावेळी म्हणाले.

पत्रकारांनी साहित्य वाटपाच्या अनेक बातम्या आपल्या दैनिकातून प्रसिद्ध केल्या परंतु त्यांच्या पाल्यांना आत्तापर्यंत शैक्षणिक साहित्य कुणीही दिले नाही मात्र आमदार अमोल खताळ यांनी पत्रकारांच्या पाल्यांना शालेय साहित्य देऊन आपली सामाजिक बांधिलकी जपली असल्याचे जिल्हा खजिनदार गोरक्ष नेहे आणि सदस्य संजय अहिरे यांनी यावेळी सांगितले. उपस्थितांचे आभार जेष्ठ पत्रकार संदीप वाकचौरे यांनी मानले.