शिर्डी मतदार संघात नवीन उद्योगांच्या संधी वाढणार!  खा.वाकचौरे व पोखरकर यांची सकारात्मक चर्चा

या बैठकीत स्थानिक तरुणांना रोजगार मिळावा, स्थलांतर थांबवावे आणि ग्रामीण भागातही उद्योगांची चळवळ निर्माण व्हावी, यासाठी केंद्र शासनाच्या विविध योजनांबाबत मार्गदर्शन करण्यात आले. पोखरकर यांनी सूक्ष्म, लघु व मध्यम उद्योग मंत्रालयाच्या अनुदान योजना, स्टार्टअप प्रोत्साहन योजना, तसेच पीएमईजीपी, एससी – एसटी हब, एमएसई – सी डी पी, सीजीटी एमएसई, यांसारख्या योजनांबद्दल माहिती दिली. तसेच या योजनांमधून महिलांना देखील कर्ज, प्रशिक्षण, मार्केटिंग सपोर्ट मिळू शकतो.त्यामुळे महिला उद्योजक घडवण्यासाठी मोठी मदत होणार असल्याचे सांगितले.

खासदार भाऊसाहेब वाकचौरे  म्हणाले, संदीप पोखरकर हे एक अधिकारी असून, सध्या केंद्रीय सूक्ष्म, लघु आणि मध्यम उद्योग मंत्री जितनराम मांझी यांचे सल्लागार म्हणून जबाबदारीने काम पाहत आहेत. ही महाराष्ट्रासाठी अत्यंत अभिमानाची गोष्ट आहे. शिर्डी लोकसभा मतदार संघात बेरोजगारी कमी करणे आणि स्थानिक युवकांना योग्य संधी उपलब्ध करून देणे हे आपले प्राथमिक उद्दिष्ट आहे. केंद्र शासनाच्या योजनांचा प्रभावी उपयोग करून मोठ्या प्रमाणात उद्योग, लघुउद्योग आणि उद्यमशीलता वाढवण्याचा मानस आहे.मंत्रालयामार्फत आवश्यक सहकार्य आणि मार्गदर्शन पुरवले जाईल. योग्य प्रकल्प अहवाल आणि स्थानिक गरजांनुसार कंपन्या व प्रकल्प आणण्यास प्राधान्य दिलं जाईल असे आश्वासन पोखरकर यांनी दिले.या भेटीमुळे शिर्डीमधील नागरिकांमध्ये आशा आणि उत्साह निर्माण झाला असून तरुणांना स्थानिक स्तरावर रोजगार आणि उद्योजकतेच्या संधी मिळण्याची शक्यता बळावली आहे.