पुरोहित प्रतिष्ठानच्या वतीने आज ‘कुंकुमार्चन सोहळा’ 

 मागील अनेक वर्षांपासून संगमनेर मध्ये होणारा कुंकुमार्चन सोहळा महिला वर्गामध्ये प्रचंड लोकप्रिय ठरला आहे. भक्ती शक्तीचे प्रतिक असलेल्या करवीर निवासिनी माता महालक्ष्मी देवी, जगदंबा, दुर्गा, कालिका, शारदा, सरस्वती, रेणुका, सप्तशृंगी अशा अष्ट देवींच्या कृपेचे प्रासादिक कुंकू या सोहळ्यात लाभत असल्याने ही महिलांसाठी मोठी पर्वणी असते. श्रीशारदीय नवरात्रोत्सवानिमित्त पुरोहित प्रतिष्ठान (संगमनेर पुरोहित संघ) प्रतीवर्षी कुंकुमार्चन सोहळ्याचे आयोजन करीत असतो. यंदा या उपक्रमाचे १२ वे वर्ष आहे. हा सोहळा आज शुक्रवारी सायंकाळी ४.३० वाजता मालपाणी लॉन्स सभागृहात संपन्न होणार आहे. सर्व महिलांना विनामुल्य सहभाग घेता येणार आहे. महिलांनी श्री अन्नपूर्णा देवी मूर्ती व श्रीयंत्र घेऊन पूजनास उपस्थित राहावे असे आवाहन करण्यात आले आहे.