श्रीरामपूर पालिकेच्या वसुली पथकाची गाळे ‘सील’ मोहीम 70 गाळेधारकांनी अंदाजे 35 लाख रुपयांचे भाडे थकविले
नायक वृत्तसेवा, श्रीरामपूर
येथील नगरपालिकेच्या वसुली पथकाने गुरुवारी (ता.3) न्यायालयाशेजारील मिनी स्टेडियममधील अनेक गाळे थकबाकी असल्याकारणाने ‘सील’ केले. या स्टेडियममधील सुमारे 70 गाळेधारकांनी नगरपालिकेचे अंदाजे 35 लाख रुपयांचे भाडे थकविले आहे. त्यामुळे ही कारवाई करण्यात आल्याचे समजते.
दरम्यान 1 फेब्रुवारीपासून वसुलीसाठी थेट गाळे सील करण्याची मोहीम हाती घेणार असल्याची माहिती पालिकेच्या वसुली पथक सूत्रांनी दिली होती. श्रीरामपूर नगरपालिकेचे संतलूक हॉस्पिटल रस्त्यावरील न्यायालयाशेजारी मिनी स्टेडियम आहे. यात असलेल्या 103 गाळ्यांपैकी 30 ते 35 गाळे गेल्या अनेक वर्षांपासून बंद अवस्थेत आहेत. तर उर्वरित गाळेधारकांकडे वर्षांनुवर्षापासून लाखो रुपयांची थकबाकी आहे. तर यातील अनेक गाळे आजही सोयी सुविधांअभावी बंद अवस्थेत आहेत.
भाडे थकबाकीदारांमध्ये माजी नगरसेवक, त्यांचे नातेवाईक, विविध पक्षांचे पदाधिकारी, वकील, विविध संस्था अशा अनेकांचा सहभाग आहे. सदरची थकबाकी ही गेल्या 10 ते 12 वर्षांपासूनची थकीत आहे. ही थकबाकी वाढत असताना नगरपालिकेच्या वसुली विभागातील अधिकारी-कर्मचारी यांनी या मिनी स्टेडियममधील थकबाकीदारांकडे असलेल्या वसुली संदर्भात प्रयत्न केले नव्हते. पालिकेच्या या मालमत्तेसह संपूर्ण शहरभर इतरही मालमत्ताधारकांकडून लाखो रुपयांची थकबाकी पालिकेला येणे आहे. वसुली विभाग या थकबाकीधारकांना पाठिशी घालत असल्याची भावना काही नागरिकांनी व्यक्त केली होती. सदरची कोट्यवधी रुपयांची थकबाकी वेळेवर वसूल होत नसल्यामुळे पालिकेच्या विकासकामांवर त्याचा खूप मोठ्या प्रमाणावर परिणाम होतो.
या पार्श्वभूमीवर नगरपालिकेच्या वसुली विभागाने मिनी स्टेडियममधील गाळेधारकाकडे असलेल्या वसुलीसाठी या सर्व भोगवटादार गाळेधारकांना गेल्या 20 दिवसांपूर्वी नोटिसा बजावल्या होत्या. मात्र ही थकबाकी भरण्यासाठी अद्यापही कुणी पुढे आले नाहीत. सर्वाधिक 4 लाख रुपये तर कमीत कमी 6 हजार अशी थकबाकीची या स्टेडियममधील गाळेधारकांकडे रक्कम आहे. प्रांताधिकारी अनिल पवार यांनी या पालिकेची प्रशासक म्हणून सूत्रे हाती घेतली आहेत. त्या पार्श्वभूमीवर ही मोहीम यशस्वी होण्याची चिन्हे आहेत. पालिकेने संपूर्ण शहरभर या व अशा अनेक मालमत्ताधारकांकडे असलेल्या लाखो रुपयांच्या थकबाकीसाठी गाळे सील करण्याची मोहीम पालिकेच्या वसुली पथकाने हाती घेतल्याचे सर्व स्तरातून स्वागत होत आहे.
