माजी आमदार कोल्हेंचा वीज मंडळाच्या कार्यालयातच ठिय्या कोपरगाव मतदारसंघातील रोहित्र तातडीने दुरुस्त करण्याची मागणी

नायक वृत्तसेवा, कोपरगाव
कोरोना महामारीच्या काळात मोठ्या आर्थिक संकटाला शेतकरी बांधव सामोरे जात असताना वीज वितरण कंपनी त्यांना आणखी आर्थिक खाईत लोटण्याचे काम करत आहे. बिले भरूनही विद्युत रोहित्र दिले जात नसल्याने भारतीय जनता पक्षाच्या प्रदेश सचिव तथा माजी आमदार स्नेहलता कोल्हे यांनी नुकतेच वीज मंडळाच्या अधिकार्‍यांना जाब विचारत तातडीने रोहित्र बसवून देण्याची मागणी करून कार्यालयातच ठिय्या आंदोलन केले.

कोपरगाव येथील महाराष्ट्र वीज वितरण कंपनीच्या कार्यालयात जाऊन कोल्हे यांनी उपस्थित सहाय्यक अभियंता दिनेश चावडा यांना मतदारसंघातील विद्युत रोहित्राअभावी होत असलेल्या नुकसानीबाबत धारेवर धरले. यावेळी विविध गावांतील शेतकरी बांधव उपस्थित होते. यावेळी माजी आमदार कोल्हे म्हणाल्या, सध्या विजेचा खेळखंडोबा सुरू आहे. अगोदरच अडचणीत असलेल्या शेतकरी बांधवांच्या भावनेशी खेळ सुरू आहे. कोरोना सारख्या महामारीच्या संकटात अनेक कुटुंंबांना आर्थिक फटका बसला आहे. सध्या पावसाने ओढ दिली असून विहिरीच्या पाण्यावर जनावरांच्या चार्‍यासह इतर पिकांची लागवड केली आहे. आर्थिक परिस्थिती नसतानाही पिके उभी केली. परंतु वीज वितरण कार्यालयाच्या ढिसाळ नियोजनामुळे हाती आलेली पिके वाया जात आहेत. त्याचप्रमाणे वारंवार वीज बिले भरण्याची मागणी करून मन:स्ताप देण्याचे काम केले जात आहे. वीज वितरण कंपनीच्या मागणीप्रमाणे वीज बिले भरूनही विद्युत रोहित्र बसविण्यास टाळटाळ केली जात असून महिनोनमहिने विद्युत रोहित्र देण्यास टाळाटाळ करून अधिकारी विद्युत रोहित्र वाटपात दुजाभाव करीत असल्याचा आरोपही कोल्हे यांनी केला.

दरम्यान, ब्राम्हणगाव येथील वाकचौरे रोहित्र गेल्या एक महिन्यांपासून जळालेले आहे. वारंवार मागणी करूनही दुरुस्ती केली जात नाही. यामुळे येथील नागरिकांसह जनावरेही पाण्यापासून वंचित आहेत. अनेक कुटुंबांच्या घरातील वीज बंद असल्याने शेतकरी बांधवांमध्ये असंतोषाचे वातावरण आहे. या परिस्थितीमध्ये वीज मंडळ त्यांना दुजाभावाची वागणूक देऊन त्यांच्या भावनांशी खेळत आहे. ही अन्यायकारक भूमिका आम्ही कदापिही खपवून घेणार नाही. विद्युत रोहित्र तातडीने दुरूस्त करून शेतकर्‍यांना न्याय द्यावा. अन्यथा वीज वितरण मंडळाच्या विरोधात तीव्र आंदोलन छेडण्यात येईल, असा इशारा कोल्हे यांनी दिला आहे.

ऊर्जा राज्यमंत्री प्राजक्त तनपुरे यांच्यासह वीज वितरण कंपनीचे अधीक्षक अभियंता संतोष सांगळे, कार्यकारी अभियंता मुळे यांच्याशी संपर्क साधून कोपरगाव विधानसभा मतदारसंघातील विद्युत पुरवठा तातडीने सुरळीत करावा. तसेच नादुरुस्त विद्युत रोहित्र तातडीने बसवून द्यावे.
– स्नेहलता कोल्हे (माजी आमदार, कोपरगाव)