शिर्डीत प्रसादरुपी बुंदीच्या लाडू पाकिटांची विक्री सुरू! प्रवेशद्वार क्रमांक चार व हनुमान मंदिराशेजारील साई कॉम्प्लेक्समध्ये मिळणार
नायक वृत्तसेवा, शिर्डी
श्री साईबाबा संस्थान विश्वस्त व्यवस्था शिर्डीच्यावतीने ‘श्रीं’च्या दर्शनासाठी येणार्या भाविकांना प्रसादरुपी बुंदीच्या लाडू पाकिटांची विक्री शनिवारपासून (ता.20) करण्यात येणार असून प्रवेशद्वार क्रमांक 4 व हनुमान मंदिराशेजारील साई कॉम्प्लेक्स येथे लाडू विक्री काऊंटर सुरु करण्यात आलेले आहे, अशी माहिती संस्थान प्रशासनाने दिली आहे.
श्री साईबाबा संस्थानच्या मार्फत सन 1990 पासून श्री क्षेत्र शिर्डी येथे येणार्या साईभक्तांना तिरुपती देवस्थानाच्या धर्तीवर साजूक तुपातील व खिसमीस, काजू, बदाम, विलायची आदिंचा समावेश करुन बुंदीच्या लाडूची प्रसाद स्वरुपात विक्री केली जाते. जगभरात, देश व राज्यात आलेल्या कोरोना विषाणूच्या संकटामुळे प्रतिबंधात्मक उपाययोजना म्हणून शासनाच्यावतीने लॉकडाऊन करुन दिनांक 17 मार्च, 2020 पासून श्री साईबाबांचे समाधी मंदिर साईभक्तांना दर्शनासाठी बंद करण्यात आलेले होते. त्यामुळे सशुल्क लाडू प्रसाद पाकीट विक्री पूर्णत: बंद करण्यात आली होती.
14 नोव्हेंबर, 2020 रोजी राज्य शासनाच्या आदेशान्वये 16 नोव्हेंबरपासून श्री साईबाबांचे समाधी मंदिर भाविकांच्या दर्शनासाठी काही अटी/शर्तींवर खुले करण्यात आलेले आहे. तसेच कोविड-19 चे संदर्भात सर्व नियमांचे व मार्गदर्शक नियमांचे पालन करून लाडू प्रसाद उत्पादन पुन:श्च प्रायोगिक तत्वावर सुरू करण्यात आलेले असून 6 मार्च, 2021 पासून श्रींच्या दर्शनासाठी येणार्या भक्तांना दर्शन झालेनंतर दर्शन रांगेत अंदाजे 50 ग्रॅम वजनाचा 1 बुंदी लाडू प्रसाद रुपाने पाकिटातून विनामूल्य वाटप करण्यात येत आहे. त्यानुसार साईभक्तांकडून मागणी होत असल्याप्रमाणे 20 मार्चपासून लाडू प्रसाद विक्री सुरू करण्यात येणार आहे. 3 लाडू असलेल्या पाकिटाकरीता ‘ना नफा ना तोटा’ या तत्वावर 25 रुपयांप्रमाणे विक्री केली जाणार आहे. सदरचे लाडू विक्री काऊंटर हे प्रवेशद्वार क्रमांक 4 व हनुमान मंदिराशेजारील साई कॉम्प्लेक्स येथे उपलब्ध असणार आहे. सदरचा लाडू रोज तयार करुन विक्रीसाठी ठेवण्यात आले असून ते भक्तांना त्या-त्या दिवशी उपलब्ध असेपर्यंत विकत घेता येतील. सदरचे लाडू अत्यंत शास्त्रोक्त पद्धतीने तयार करण्यात येत असून त्याचा वापर भक्तांनी प्रसाद म्हणून त्वरीत सेवन करावा. त्याचा वापर 24 तासांचे आत करण्यात यावा. बुंदी लाडू प्रसाद हा सुधारित पद्धतीने तयार करण्यात आलेला असून भक्तांना त्याची प्रदीर्घ काळापासून प्रतीक्षा व मागणी देखील होती.
