शिर्डी प्रशासन करतेयं अतिक्रमणमुक्त नाल्याचे पथदर्शी काम! प्रशासनाच्या सांघिक कामगिरीमुळे नाले घेतायेत मोकळे श्वास

नायक वृत्तसेवा, शिर्डी
‘एकमेका सहाय्य करू, अवघे धरू सुपंथ’ या संत तुकारामांच्या उक्तीचा प्रत्यय आपणास शिर्डी येथे प्रशासन सांघिकपणे राबवितं असलेल्या नाल्यावरील अतिक्रमणमुक्त मोहिमेतून दिसून येत आहे. महसूल मंत्री राधाकृष्ण विखे पाटील यांच्या आदेशानुसार उपविभागीय अधिकारी गोविंद शिंदे यांच्या नेतृत्वाखाली शिर्डीतील नाल्यावरील अतिक्रमण युद्धपातळीवर काढण्यात येत आहेत. या मोहिमेमुळे नाले, ओढे मोकळा श्वास घेत असून अतिवृष्टीमुळे शिर्डीत भविष्यात कधीच पूरसदृश्य परिस्थिती निर्माण होणार नाही, असे दूरदर्शी, पथदर्शी काम शिर्डीतील सर्व शासकीय विभाग एकमेकांशी समन्वय ठेवत करत आहेत.

शिर्डी व परिसरात ऑगस्ट व सप्टेंबर महिन्यात उच्चांकी पाऊस झाला. या अतिवृष्टीमुळे शिर्डीत पूरसदृश्य परिस्थिती निर्माण झाली. नगरपरिषदेमधील अनेक भाग पाण्याखाली गेले. नागरिकांच्या घरे, झोपड्यांमध्ये पाणी शिरले. यामुळे शिर्डीकरांचे अतोनात हाल झाले. कधी नव्हे ते साईबाबा संस्थान 200 रूम रूग्णालय, शासकीय विश्रामगृह पाण्याखाली गेले. शिर्डीच्या या नाजूक परिस्थितीचा अंदाज घेत खासदार डॉ. सुजय विखे पाटील यांनी पूरग्रस्तांच्या भेट घेऊन मदत ही दिली. महसूल मंत्री राधाकृष्ण विखे पाटील यांनी 20 सप्टेंबर 2022 रोजी शिर्डीतील पूरपरिस्थितीची पाहणी करत नगरपरिषदेत प्रशासनाची आढावा बैठक घेतली. यात शिर्डीतील पूरपरिस्थिती निर्माण होण्यास येथील नाले व ओढ्यावरील अतिक्रमणचं कारणीभूत असून कोणत्याही राजकीय दबावाला बळी न पडता या अतिक्रमणावर बुलडोझर फिरविण्याचे आदेश महसूल मंत्र्यांनी दिले.

महसूल मंत्र्यांच्या आदेशानुसार अप्पर जिल्हाधिकारी सोनप्पा यमगर यांच्या मार्गदर्शनाखाली शिर्डी उपविभागीय अधिकारी गोविंद शिंदे यांनी अतिक्रमण निर्मूलनासाठी योजनापूर्वक नियोजन आखले. यासाठी विविध विभागांच्या अधिकार्‍यांच्या नेतृत्वाखाली 11 पथके तयार करण्यात आली आहेत. यामध्ये महसूल, पोलीस, पाटबंधारे, जलसंधारण, लघु पाटबंधारे, मलनिस्सारण विभाग, नगरपरिषद, भूमी अभिलेख, ग्रामविकास, साईबाबा संस्थान या विभागांच्या मदतीने संयुक्त मोहीम आखण्यात आली. नाला क्रमांक 34 व 35 वर प्रामुख्याने अतिक्रमण झाले होते. यासाठी 2 बुलडोझर व 5 पोकलेन, इतर मनुष्यबळ व सामग्रींचा वापर करून अतिक्रमणाची मोहीम युद्ध पातळीवर राबविण्यात येत आहे. नाले, ओढ्यावरील अतिक्रमण काढण्याबरोबर खोलीकरण व रूंदीकरणाचे कामही करण्यात येत आहे. वाहत्या पाण्याचा प्रवाह सुरळीत झाल्यामुळे शिर्डीकरांना पूराचा संभाव्य फटका बसणार नाही. शेतपिके, नाल्या शेजारील घरे, दुकान यांचे नुकसान होणार नाही. संभाव्य जीवित व वित्तहानी टळणार आहे. अतिवृष्टीमुळे पुनःश्च पूरपरिस्थिती निर्माण होणार नाही, असे पथदर्शी, शाश्वत काम शिर्डीत होत आहे.

नाले, ओढे अतिक्रमणमुक्त करण्याची ही विशेष मोहीमेचे संनियंत्रण राहाता तहसीलदार कुंदन हिरे, शिर्डी नगरपरिषदेचे मुख्याधिकारी काकासाहेब डोईफोडे, राहाता भूमी अभिलेख उपअधीक्षक नरेंद्र पाटील, पाटबंधारे विभागाचे कार्यकारी अभियंता एस. डी. शिंदे, संजय पटलवार, जिल्हा जलसंधारण अधिकारी मनोज ढोकचौळे व पी. बी. गायसमुद्रे हे करत आहेत. एकूण 11 पथकांमध्ये विविध विभागांच्या 50 अधिकारी व 100 पेक्षा जास्त कर्मचारी यशस्वीपणे कामकाज करत आहेत.