जळगावातही भाजपला जोरदार धक्का; महापालिकेची सत्ता गेली भाजपच्या फुटीर नगरसेवकांच्या मदतीनं शिवसेनेने महापौरपदाची निवडणूक जिंकली

जळगाव, वृत्तसंस्था
सांगली-मिरज-कुपवाड महापालिकेत राष्ट्रवादी काँग्रेसने ‘करेक्ट कार्यक्रम’ केल्यानंतर आता जळगाव महापालिकेत शिवसेनेने भाजपला जोरदार दणका दिला आहे. भाजपच्या फुटीर नगरसेवकांच्या मदतीनं शिवसेनेने जळगाव महापालिकेच्या महापौरपदाची निवडणूक जिंकली आहे. त्यामुळे सलग दुसरी महापालिका भाजपच्या हातातून निसटली आहे. राज्यातील सध्याच्या घडामोडींमुळे बॅकफूटवर असलेल्या महाविकास आघाडीसाठी विशेषत: शिवसेनेसाठी हा मोठा दिलासा मानला जात आहे.

जळगाव महापालिकेच्या महापौरपदासाठी आज निवडणूक झाली. या निवडणुकीत शिवसेनेच्या जयश्री महाजन यांनी भाजपच्या प्रतिभा कापसे यांचा तब्बल 15 मतांनी पराभव करत बाजी मारली. जयश्री महाजन यांना 45 मतं मिळाली, तर प्रतिभा कापसे यांना 35 मते मिळाली. भाजपचे 27 नगरसेवक फुटल्याने व एमआयएमच्या तीन नगरसेवकांनी देखील शिवसेनेच्या पारड्यात मत टाकल्यानं शिवसेनेचा विजय सुकर झाला.

महापौरपदाची मतमोजणी झाली असली तरी उपमहापौर निवडीची प्रक्रिया अजून सुरू आहे. शिवसेनेच्या उमेदवाराचा अर्ज अवैध असल्याचा दावा भाजपने केला आहे. भाजपचे सदस्य आक्रमक झाल्यानं सध्या पालिका सभागृहात प्रचंड गदारोळ सुरू आहे. जळगाव महापालिकेत भाजपचे 57, शिवसेनेचे 15, एमआयएमचे तीन असे एकूण 75 नगरसेवक आहेत. मात्र, ऐन निवडणुकीच्या आधी अंतर्गत राजकारणातून भाजपमध्ये फूट पडली होती. भाजपचे 27 नगरसेवक ‘नॉट रिचेबल’ झाले होते. त्यामुळे भाजपची कोंडी झाली होती. ही कोंडी फोडण्यासाठी अखेरपर्यंत प्रयत्न सुरू होते. मात्र, त्यात यश आले नाही हेच आजच्या निकालातून दिसून आलं आहे.