सोमवारी जिल्हा परिषद व पंचायत समित्यांची आरक्षण सोडत

राज्य निवडणूक आयोगाच्या आदेशान्वये जिल्हा परिषद निवडणूक विभागासाठी नागरिकांचा मागास प्रवर्ग (महिला आरक्षणासह) व अनुसूचित जाती, अनुसूचित जमाती व सर्वसाधारण महिलांसाठी आरक्षण सोडत काढण्याची जबाबदारी जिल्हाधिकारी यांच्यावर सोपविण्यात आली आहे. पंचायत समिती गणाकरिता संबंधित तालुक्याचे तहसीलदार हे प्राधिकृत अधिकारी असतील. तसेच प्रत्येक पंचायत समितीतील सोडतीच्या कार्यवाहीवर देखरेख ठेवण्यासाठी उपजिल्हाधिकारी दर्जाच्या अधिकाऱ्यांची नेमणूक करण्यात आली आहे. राज्य निवडणूक आयोगाच्या मार्गदर्शक सूचनांनुसार जिल्ह्यातील सर्व १४ तालुक्यांमध्ये १३ ऑक्टोबर रोजी दुपारी १२ वाजता पंचायत समिती क्षेत्रांच्या आरक्षण सोडतीसाठी विशेष सभा आयोजित करण्यात आल्या आहेत. जिल्हा परिषदेच्या जागांसाठी मुख्य सोडत कार्यक्रम नेहरू सभागृह, जिल्हाधिकारी कार्यालय, अहिल्यानगर येथे दि. १३ ऑक्टोबर रोजी दुपारी १२ वाजता पार पडणार आहे.