रेणुका कला केंद्रावर टोळक्याचा हातात कोयते घेऊन धुडगूस; परस्परविरोधी तक्रारी दाखल 

थिएटरचे मालक अनिल पवार व त्यांची मुले परसू पवार, मोहित पवार यांना कोयत्याचा धाक दाखवत आम्हाला दर महिन्याला एक लाख रुपये आणून द्यायला सांगा, नाहीतर आम्ही थिएटर चालू देणार नाही, असे म्हणत टोळक्याने धमकावले. तसेच कोयत्याने थिएटरमधील खुर्चा, टेबल व दुचाकींची तोडफोड केली.  नृत्यकाम करणाऱ्या मुलींची छेड काढून त्यांच्याशी अश्लिल वर्तन केले. याप्रकरणी चौघांविरुद्ध खंडणी, विनयभंग व आर्म ॲक्ट अन्वये गुन्हा दाखल करण्यात आला आहे. याबाबत रेणुका कलाकेंद्रातील नृत्यांगना ज्योती शिवाजी जाधव (वय ४५) हिने जामखेड पोलिस ठाण्यात फिर्याद दिली. त्यानुसार, मोहा येथील अनिल पवार यांच्या रेणुका कलाकेंद्रावर  रात्री ८.४५ वाजता नृत्यकाम करीत असताना तेथे शुभम लोखंडे, सतीश टकले, नागेश रेडेकर, (सर्व रा. आष्टी) व अक्षय मोरे (चिंग्या) (रा. जामखेड) हे हातात कोयते घेऊन आले. तसेच त्यांनी हातातील कोयत्याने थिएटरमधील खुर्चा, टेबल व  दोन दुचाकींची तोडफोड केली. नृत्यकाम करणाऱ्या मुलींची छेडछाड केली व अश्लील वर्तन केले. कान्होपात्रा येथे थिएटर मालक अनिल पवार यांनी नवरात्र उत्सवानिमित्त लावलेले बॅनर फाडले, तसेच त्यांच्या बीड रोड येथील हॉटेलची तोडफोड केली. रेणुका कलाकेंद्रात आल्यावर ते नेहमीच दमदाटी करुन मुलींना नृत्यकाम करण्यास सांगतात. पैसे न देताच निघुन जातात. मालक अनिल पवार यांना दमदाटी करुन पैसे घेऊन जात असल्याचे फिर्यादीत म्हटले आहे.