अकोले आणि संगमनेर तालुक्यासाठी हा रस्ता वाहतुकीच्या दृष्टीने अत्यंत महत्त्वाचा आहे. दररोज हजारो वाहने या मार्गावरून ये-जा करतात. यामध्ये एसटी बस, दूध आणि भाजीपाला वाहतूक करणारे टेम्पो, मालवाहू ट्रक, खासगी चारचाकी आणि दुचाकी वाहनांचा मोठ्या प्रमाणावर समावेश असतो. मात्र, गेल्या अनेक महिन्यांपासून या रस्त्याची दुरुस्ती न झाल्याने त्याची अक्षरशः चाळण झाली आहे. मंगळापुर परिसरातील दौलत पेट्रोल पंप ते चिखली ते कळसपर्यंतच्या पट्ट्यात या मार्गावर मोठ मोठे आणि खोल खड्डे पडले आहेत. पावसाळ्यात या खड्ड्यांमध्ये पाणी साचल्याने त्याचा अंदाज येत नाही, त्यामुळे लहान-मोठे अपघात नित्याचेच झाले आहेत.

या खड्ड्यांमुळे वाहनांचे मोठ्या प्रमाणात नुकसान होत आहे. टायर फुटणे, सस्पेंशन खराब होणे आणि इतर तांत्रिक बिघाड वाहनचालकांसाठी डोकेदुखी ठरत आहेत. याशिवाय, सततच्या हादऱ्यांमुळे प्रवाशांना मणक्याचे आणि मानेचे आजार जडत आहेत. विशेषतः दुचाकीस्वारांसाठी हा प्रवास जीवघेणा ठरत असून, खड्डे चुकवण्याच्या नादात अनेकदा वाहने घसरून अपघात घडत आहेत. नागरिकांना रोज याच रस्त्यावरून संगमनेरला कामासाठी जावे लागते.  शेतकऱ्यांसाठीही हा रस्ता महत्वाचा आहे , परंतु आपला शेतमाल, भाजीपाला आणि दूध, वेळेवर बाजारपेठेत पोहोचणे गरजेचे असते, पण खड्ड्यांमुळे वाहतुकीचा वेग कमी होतो आणि बाजारपेठेत पोहोचायला देखील उशीर होतो. यामुळे शेतीमालाचे नुकसान होते. तसेच या मार्गावरून प्रवास करताना वाहनांचेही मोठे नुकसान होत असून, दुरुस्तीच्या खर्चाचा अतिरिक्त भुर्दंड वाहनमालकांना सोसावा लागत आहे. या गंभीर समस्येकडे सार्वजनिक बांधकाम विभागाने पूर्णपणे कानाडोळा केला आहे. त्यामुळे नागरिकांमध्ये तीव्र संतापाची भावना आहे. एखादी मोठी दुर्घटना घडण्यापूर्वी प्रशासनाने जागे होऊन रस्त्याचे तातडीने आणि दर्जेदार पद्धतीने डांबरीकरण किंवा रस्त्याची दुरुस्ती करावी, अशी जोरदार मागणी प्रवाशांकडून आणि स्थानिक नागरिकांकडून केली जात आहे.