वसतीगृह व ट्रेनिंग सेंटर मुळे आदिवासी विद्यार्थ्यांना मोठी संधी : थोरात

तालुक्यातील कोळवाडे येथे जयहिंद आदिवासी आश्रम शाळेचा वर्धापन दिन,  महात्मा गांधी जयंती व फादर रॉबर्ट यांच्या अभिष्टचिंतन सोहळ्यानिमित्त आयोजित कार्यक्रमात ते बोलत होते.  अध्यक्षस्थानी माजी आ. डॉ. सुधीर तांबे  होते तर व्यासपीठावर सुधाकर जोशी, गणपत सांगळे, विष्णुपंत रहाटळ, काशिनाथ गोंदे,मुख्याध्यापक दशरथ वर्पे, के.के. थोरात, शरद थोरात आदींसह स्थानिक ग्रामस्थ व पदाधिकारी उपस्थित होते.याप्रसंगी  बाळासाहेब थोरात यांच्या हस्ते आदिवासी विद्यार्थ्यांसाठी नवीन वसतीगृह व ट्रेनिंग सेंटर इमारतीचे भूमिपूजन करण्यात आले.

यावेळी बोलताना माजी मंत्री बाळासाहेब थोरात म्हणाले, शिक्षण हा समाजाच्या प्रगतीचा पाया आहे. आदिवासी व गोरगरीब मुलांच्या शिक्षणासाठी दर्जेदार सुविधा व्हावी याकरता सहकार महर्षी भाऊसाहेब थोरात यांनी कोळवाडे येथे आदिवासी आश्रम शाळा सुरू केली. या आश्रम शाळेतील ६१० विद्यार्थी राज्यभरात विविध मोठ्या पदांवर कार्यरत असून हे संस्थेसाठी अभिमानास्पद आहे. आदिवासी व गरीब समाजातील पालकांनी शिक्षणाला प्राधान्य द्यावे. अत्यंत चांगल्या सुविधा या शाळेमध्ये असून नव्याने होत असलेल्या ट्रेनिंग सेंटर मधून विद्यार्थ्यांना अत्याधुनिक शिक्षण प्रणाली मिळणार आहे. याचबरोबर दर्जेदार असे वसतीगृह याठिकाणी होणार असल्याने विद्यार्थ्यांची राहण्याची मोठी सोय होणार आहे.