अखेर भंडारदरा धरण तांत्रिकदृष्ट्या भरले! धरणातून प्रवरापात्रात २० हजार ७६३ क्यूसेक्सने विसर्ग सुरू

धरणाच्या पाणलोट क्षेत्रात गत दोन दिवसात धुव्वाधार पाऊस कोसळत असून धरणाचा पाणीसाठा पुन्हा एकदा ९८ टक्क्यावर पोहोचला आहे. पाणलोात  जोरदार पाऊस सुरू असल्याने ओढे नाले खळखळून वाहू लागले आहेत. परिसरात मोठ्या प्रमाणात धबधबेही वाहू लागले असून हे सर्व पाणी निळवंडे धरणाला जाऊन मिळत आहे. त्यामुळे निळवंडेच्या पाण्यातही झपाट्याने वाढ सुरू आहे. निळवंडे धरणाच्या पाणलोटातही पाऊस पडत असून भंडारदरा धरणाच्या खालील भागात पडणाऱ्या पावसाचे पाणी निळवंडे धरणात जमा होत आहे. त्यामुळे निळवंडे धरणाचा पाणीसाठा ही ८७ टक्क्यापर्यंत  पोहोचला.

मंगळवारी भंडारदरा परिसरात १०५ मी.मी., घाटघर येथे १६० मि.मी., पांजरे १०५ मि.मी., रतनवाडी १७० मि.मी.पाऊस पडला.  भंडारदरा धरणात एकूण पाणीसाठा १० हजार ९९६ दशलक्ष घनफूट म्हणजेच ९८ टक्के  झाला  आहे तर निळवंडे धरणात एकूण पाणीसाठा सात हजार ७१८९ दशलक्ष घनफूट झाला असून निळवंडे धरण ही जवळपास ८७ टक्क्यापर्यंत  भरले आहे.