समृद्धी महामार्गावरील कोकमठाण शिवारात कारचा भीषण अपघात एअर बॅग उघडूनही दोघांचा दुर्दैवी मृत्यू; तर दोन तरूणी जखमी

नायक वृत्तसेवा, कोपरगाव
हिंदुहृदयसम्राट बाळासाहेब ठाकरे महाराष्ट्र समृद्धी महामार्गावर कोकमठाण (ता.कोपरगाव) शिवारात भरधाव कारचा टायर फुटून कार दुभाजकावर आदळली. ही धडक इतकी जोरदार होती की कारच्या समोरील भागाचा पूर्ण चक्काचूर झाला असून दोन्ही एअर बॅग उघडले तरी दोघांचा दुर्दैवी मृत्यू झाला आहे. तर दोन तरूणी जखमी झाल्या आहेत. जखमींवर कोपरगावच्या एसजेएस रुग्णालयात उपचार सुरू आहेत.

हिंदुहृदयसम्राट बाळासाहेब ठाकरे महाराष्ट्र समृद्धी महामार्गाचे दोन महिन्यांपूर्वी पंतप्रधान नरेंद्र मोदी यांच्या हस्ते उद्घाटन झाल्यानंतर सर्वसामान्यांसाठी हा महामार्ग खुला करण्यात आला आहे. समृद्धी महामार्ग खुला झाल्यापासून अनेक अपघात या महामार्गावर घडले आहेत. दोन दिवसांपूर्वी कोपरगावच्या शिर्डी इंटरचेंजजवळ एक भरधाव कार संरक्षण कठड्यावर चढली होती, या अपघातात वाहनात असलेला चालक बालंबाल बचावला होता. मात्र, शुक्रवारी (ता.17) दुपारच्या सुमारास कोकमठाण शिवारात एक ब्रेझा कारचा (क्र.एमएच.49, बीबी.6620) डाव्या बाजूचा टायर फुटून ती कार दुभाजकावर आदळली. ही धडक इतकी जोरदार होती की कारच्या पुढच्या भागाचा पूर्ण चक्काचूर झाला आहे.

याबाबत समृद्धी महामार्गावरील सूत्रांकडून मिळालेली माहिती अशी की, राजेश राजाराम रहाटे (वय अंदाजे 52, वर्ष रा. नागपूर) हे आपली मुलगी लीना राजेश रहाटे (वय 18), भाची अवंतिका वझुलकर (वय 16) आणि मेव्हणी अलका वझुलकर (वय -42, रा. भंडारा) यांना सोबत घेऊन समृध्दी महामार्गावरून वैद्यकीय कारणास्तव नागपूरवरून नाशिकच्या दिशेने जात होते. शुक्रवारी दुपारच्या सुमारास कोपरगाव तालुक्यातील कोकमठाण शिवारात आल्यानंतर त्यांच्या कारचा टायर फुटून कार दुभाजकावर आदळली. यामध्ये राजेश रहाटे आणि अलका वझुलकर हे गंभीर जखमी झाले. स्थानिक नागरिक आणि समृद्धी महामार्गावरील मदतनीसांनी त्यांना कोपरगाव येथील हॉस्पिटलमध्ये उपचारासाठी दाखल केले असता तेथे उपस्थित डॉक्टरांनी त्यांना मृत घोषित केले. तर जखमी तरुणी लीना आणि अवंतिका यांच्यावर एसजेएस रुग्णालयात उपचार सुरू आहेत.
दरम्यान, या दुर्दैवी घटनेत लीनाने आपल्या पित्याला तर अवंतिका हिने आपल्या आईला गमावलं आहे. दरम्यान, घटनेची माहिती मिळताच महामार्ग पोलीस समृद्धी महामार्गावरील रुग्णवाहिका आणि एमएसएफचे जवान मदतीसाठी पोहोचले. यावर कोपरगाव शहर पोलीस ठाण्यात अकस्मात मृत्यूची नोंद करण्याचे काम सुरू आहे.