श्रीराम नवमी मिरणूक घटनेत पोलिसांची भूमिका पारदर्शक राहील ः पाटील नेवासा येथील घटनेबाबत पोलीस अधीक्षकांची पोलीस ठाण्यात बैठक

नायक वृत्तसेवा, नेवासा
श्रीराम नवमीच्या पूर्वसंध्येला नेवासा शहरात झालेल्या घटनेचा योग्य तो तपास करणार. तसेच सायबर क्राईमचे संपूर्ण नेवासा शहरातील सोशल मीडियावर लक्ष असून दोन्ही समाजीतील ज्येेष्ठ नागरिकांनी तरुणांना योग्य पद्धतीने समजावून सांगावे जेणेकरून कायदा-सुव्यवसस्थेचा प्रश्न निर्माण होणार नाही. समाजात जर तेढ निर्माण करण्याचा प्रयत्न कोणी करत असेल तर अशांवर कायदेशीर कारवाई करू. तसेच श्रीराम नवमी मिरणूक घटनेत पोलिसांची भूमिका पारदर्शक राहील, असे जिल्हा पोलीस अधीक्षक मनोज पाटील यांनी सांगितले.

बुधवारी (ता.13) सायंकाळी रामनवमी मिरणूक प्रकरणी नेवासा पोलीस ठाण्यात बैठक आयोजित केली होती. यावेळी ते बोलत होते. बैठकीस अप्पर पोलीस अधीक्षक सौरभ आग्रवाल, श्रीरामपूर विभागाच्या अप्पर पोलीस अधीक्षक स्वाती भोर, शेवगाव उपविभागीय अधिकारी सुदर्शन मुंढे, पोलीस निरीक्षक बाजीराव पोवार आदी उपस्थित होते. यावेळी पोलीस अधीक्षक मनोज पाटील म्हणाले, दोन्ही समाजने समजूतदारपणाने समंजस भूमिका घेऊन शांतता प्रस्थापित करण्यासाठी प्रशासनाला जे सहकार्य केले ते अभिनंदनीय आहे. शहरातील नागरिकांन कडे चांगुलपणाची शिदोरी होती म्हणून अप्रिय घटना घडली नाही, नाव वाईट होण्यास वेळ लागत नाही. चांगले नाव होण्यास वेळ लागतो. छोट्या छोट्या गोष्टीतून मोठ्या गोष्टी घडतात. तरुणांनी सोशल मीडियावर आक्षेपार्ह पोस्ट करू नये. या संदर्भात पोलिसांची करडी नजर आहे. या घटनेचा सखोल तपास करून दोषींवर कारवाई करणार असल्याचे पाटील यांनी सांगितले. घडलेली घटना अतिशय निंदनीय आहे. अशा वाईट प्रवृत्तीचा आम्ही मुस्लिम समाजाच्यावतीने निषेध करतो. बाहेरगावचे समाजकंटक येऊन हा प्रकार करतात. पोलिसांनी घटनेच्या मूळाशी जावे, असे मुस्लिम नेते अल्ताफ पठाण म्हणाले.

माजी उपनगराध्यक्ष नंदकुमार पाटील म्हणाले, यापर्वीही अशा घटना घडल्या आहेत तरी देखील नेवासा शहरात एकोपा आहे. काही चुकीच्या लोकांमुळे अशा घटना घडतात. तरी प्रशासनाने याची दखल घ्यावी. मौलाना इब्तेहाजुदिन, नगरसेवक सुनील वाघ, राजेंद्र मापारी, महेश मापारी, प्रताप चिंधे, विकास चव्हाण, संतोष गव्हाणे आदिंनी यावेळी घटने संदर्भात आपले मनोगत व्यक्त केले. सादिक शिलेदार, अन्सार पठाण, विलास चव्हाण, रायभान कोरडे, साईनाथ शिरसाट, गौतम बनकर, विकी बनकर, राजेंद्र पंडित, जुमाखान पठान, रवी आल्हाट, इमरान दारूवार्लों साजित पठाण, शिवा राजगीरे, नितीन भालेराव, संदीप आलवणे यांच्यासह पत्रकार उपस्थित होते.