साईबाबांच्या जन्मस्थळावरून नव्या वादाला तोंड फुटण्याची शक्यता! ‘मेरा साई’ मालिकेत काल्पनिक माहिती दाखवली जात असल्याचा आरोप
नायक वृत्तसेवा, शिर्डी
साईबाबांच्या जन्मस्थळावरून शिर्डी – पाथरी वाद देशभरात गाजला होता. त्या वादावर नंतर पडदा पडला असला तरी आता पुन्हा साईबाबांच्या जन्मस्थळावरून नव्या वादाला तोंड फुटण्याची शक्यता आहे. सोनी वाहिनीवर प्रसारित होणार्या ‘मेरा साई’ या मालिकेत साईबाबांच्या जीवनावर काल्पनिक माहिती दाखवली जात असल्याचा आरोप करत शिर्डीतील दोन ग्रामस्थांनी न्यायालयात धाव घेतली आहे. या मालिकेत साईबाबांचे खोटे जन्मस्थळ, नाव, गाव वापरण्यात येत असून त्यामुळे साईभक्तांचा संभ्रम होत आहे. या प्रकारामुळे साईभक्तांच्या भावना व श्रद्धेला तडे जात आहेत. त्यामुळे या मालिकेचे प्रसारित होणारे पुढील भाग त्वरीत थांबवावेत अशी मागणी करत सोनी वाहिनी विरोधात शिर्डीतील ग्रामस्थ साईभक्त सर्जेराव कोते आणि प्रमोद गोंदकर यांनी राहाता न्यायालयात याचिका दाखल केली आहे.
या याचिकेवर आज न्यायालयात पहिली सुनावणी झाली. या संदर्भात अधिक माहिती देताना याचिकाकर्त्यांचे वकील अॅड. शुभम गोंदकर यांनी सांगितले की, सध्या सोनी वाहिनीवर सायंकाळी सात ते साडेसात या दरम्यान ‘मेरा साई’ ही मालिका दाखवली जात आहे. या मालिकेत साईबाबांविषयी प्रसारित होणारी माहिती खोटी व काल्पनिक आहे. तिचा श्री साईबाबा संस्थानचे अधिकृत श्री साई चरित्र ग्रंथामध्ये कुठेही उल्लेख नाही. श्री साईबाबांचे जन्मस्थळ व त्यांच्या वडिलांचे नाव, गाव, कुळ, जात, धर्म हे कुणालाही माहित नाही. तरीही या मालिकेत त्यांचे जन्मस्थळ नाव वापरले जात आहे.
त्याचप्रमाणे बाबा शिर्डीत प्रथम आल्यानंतर खंडोबा मंदिरासमोर पुजारी म्हाळसापती यांनी आओ साई म्हटल्यानंतर बाबांचे नाव साई पडले. मात्र या मालिकेत त्यांच्या लहानपणापासूनच साई नाव देण्यात आले आहे. ही सर्व काल्पनिक व खोटी माहिती आहे. त्यामुळे साईभक्तांमध्ये संभ्रम निर्माण होत आहे. साईभक्तांच्या विश्वास, श्रद्धेला या मालिकेमुळे तडा जात आहे. श्री साई चरित्र ग्रंथ हा श्री साईबाबा हयात असताना तत्कालीन साईभक्तांनी त्यावेळी दिलेल्या माहिती व अनुभवावरून दाखले देत लिहिला गेला आहे. मात्र या साईचरित्र ग्रंथातून माहिती घेण्याऐवजी इतर 11 वेगवेगळ्या पुस्तकांतून माहिती घेऊन ही मालिका बनवली जात आहे, असा दावा याचिकाकर्त्यांनी केला आहे.
साईबाबांची समाधी झाल्यानंतर जी पुस्तके लिहिली गेली आहेत त्या संस्थान मान्यता नसणार्या पुस्तकातली माहिती या मालिकेतून सध्या प्रसारित होत आहे. या मालिकेत अनेक खोटी माहिती देण्यात आलेली आहे. बाबा प्रगट झाले होते मात्र या मालिकेत बाबांचा जन्म दाखवला गेला आहे. बाबांचा जन्म झालेला नसून बाबा प्रगट झाले होते. असे असतानाही त्यांचा जन्म दाखवला जात असून हे सर्व काल्पनिक आहे. या वाहिनीने साई जीवनावर जे संशोधन केले ते वेगळ्या पुस्तकातून केले गेले आहे. मात्र त्याला अधिकृत संस्थानची मान्यता नाही. त्यामुळे सोनी वहिनीने ‘मेरा साई’ या मालिकेतील येथून पुढे होणारे सर्व भाग थांबावेत व साईभक्तांचा संभ्रम करू नये. साईभक्तांचा विश्वास, श्रद्धा, आस्था याला तडा जाईल असे यापुढे तरी करू नये तसेच इथून पाठीमागे जे भाग प्रसारित केले त्याबद्दल साईभक्तांची जाहीर माफी मागावी. अशी मागणी करत सोनी वाहिनीच्या विरोधात शिर्डीतील ग्रामस्थ व साईभक्त सर्जेराव कोते व प्रमोद गोंदकर यांनी अॅड. बी. सी. सातव, के. बी. शिंदे, शुभम गोंदकर यांच्या माध्यमातून राहाता न्यायालयात याचिका दाखल केली आहे. रेगुलर मुकदमा नंबर 397/2021 याप्रमाणे ही याचिका राहाता न्यायालयात दाखल करण्यात आली आहे. श्री साई सच्चचरित्र ग्रंथातील माहितीच्या आधारेच पुढील मालिका प्रसारण करावी. अन्यथा मालिका बंद करावी, अशी मागणी होत असल्याने या मालिकेमुळे नव्या वादाला तोंड फुटण्याची शक्यता आहे.
