क्रिकेटपटूचा हृदयविकाराच्या तीव्र झटक्याने मृत्यू कोपरगाव येथील दुर्दैवी घटनेने जिल्ह्यात हळहळ

नायक वृत्तसेवा, कोपरगाव
क्रिकेट स्पर्धा सुरू असताना खेळाडूचा हृदयविकाराच्या झटक्याने मृत्यू झाल्याची धक्कादायक घटना कोपरगाव शहरात गुरुवारी सायंकाळी 5 ते 6 वाजेच्या दरम्यान घडली आहे. या घटनेने अहमदनगर जिल्ह्यासह सर्व क्रिकेट प्रेमींमध्ये एकच खळबळ उडाली आहे.

महाराष्ट्रात टेनिस बॉल क्रिकेट स्पर्धेला अनन्यसाधारण महत्व आहे. ग्रामीण भागातील युवा खेळाडूंना स्वतःची प्रतिभा सिद्ध करण्यासाठी टेनिस क्रिकेट एक मोठे व्यासपीठ असते. राज्यभरात अनेक खेळाडूंनी टेनिस क्रिकेटच्या माध्यमातून वेगळी ओळख निर्माण केली आहे. बदलत्या काळानुसार ग्रामीण भागात भरणार्‍या क्रिकेट स्पर्धांना देखील आधुनिक तंत्रज्ञानाची जोड मिळाली आहे. हल्ली टेनिस क्रिकेटचे अनेक सामने समाज माध्यमांवर थेट प्रसारित होत असल्याने या सामन्यांचे महत्व आणि प्रेक्षक वर्ग मोठ्या प्रमाणात वाढले आहे. मात्र हे सामने सुरू असताना अनेक धक्कादायक प्रकार देखील घडल्याची उदाहरणे आहेत. असाच एक प्रकार कोपरगावमध्ये घडला आहे.

शहरातील साई सिटी मैदानावर क्रिकेट स्पर्धा सुरू असून गुरुवारी (ता.9) क्रिकेट सामना सुरू असताना फलंदाजी करून तंबूत परतलेल्या खेळाडूला अचानक छातीत दुखू लागल्याने त्याला सहकारी खेळाडूंनी प्रथम जवळच्या खासगी रुग्णालयात व नंतर कोपरगाव ग्रामीण रुग्णालयात उपचारांसाठी दाखल केले असता त्याला वैद्यकीय अधिकार्‍यांनी उपचारापूर्वीच हृदय विकाराच्या तीव्र झटक्याने मृत्यू झाल्याचे घोषित केले. लोकेश अर्जुन ढोबळे (वय 27, रा. गजानन नगर, कोपरगाव) असे मृत झालेल्या युवा खेळाडूचे नाव आहे. लोकेशच्या मृत्यूची बातमी कळताच मोठ्या संख्येने तरुण कोपरगाव ग्रामीण रुग्णालयात जमा झाले होते. घटनेची माहिती मिळताच कोपरगाव शहर पोलिसांनी ग्रामीण रुग्णालयात पोहचून पंचनामा केला आहे. लोकेश हा मनमिळाऊ स्वभावाचा असल्याने संपूर्ण कोपरगाव शहरात हळहळ व्यक्त होत असून अहमदनगर जिल्ह्यातील स्थानिक क्रिकेट खेळाडू व क्रिकेटप्रेमींना मोठा धक्का बसला आहे.