डॉ.मुटकुळे, प्रा.डॉ.लिंबेकर यांचा ‘प्रवरा’कडून निवासस्थानी गौरव कोविड संकटामुळे पुरस्कार्थींच्या निवासस्थानी गौरविण्याचा ‘प्रवरा’चा निर्णय

नायक वृत्तसेवा, संगमनेर
साहित्य क्षेत्रातील प्रतिष्ठेच्या समजल्या जाणार्‍या राज्यस्तरीय पद्मश्री डॉ.विठ्ठलराव विखे पाटील साहित्य पुरस्काराने संगमनेरचे डॉ.सोमनाथ मुटकुळे, प्रा.डॉ.अशोक लिंबेकर यांना नुकतेच त्यांच्या निवासस्थानी जावून प्रवरा परिवाराच्यावतीने गौरविण्यात आले.

सहकार चळवळीचे जनक पद्मश्री डॉ.विठ्ठलराव विखे पाटील यांच्या जयंती दिनाचे औचित्य साधून दरवर्षी साहित्य, कलागौरव आणि प्रबोधनात्मक कार्य करणार्‍या व्यक्तींना पद्मश्री डॉ.विठ्ठलराव विखे पाटील यांच्या नावाने दिल्या जाणार्‍या पुरस्काराने गौरविण्याची परंपरा मागील तीस वर्षांपासून अखंडीतपणे सुरू आहे. अखिल भारतीय मराठी साहित्य संमेलनाच्या अध्यक्षांच्या हस्ते पद्मश्रींच्या जयंती दिनी नारळी पौर्णिमेला हे पुरस्कार प्रदान केले जातात.

कोविड संकटामुळे मागील वर्षी साहित्य पुरस्कार सोहळा होवू शकला नाही. यंदाही तीच परिस्थिती कायम असल्याने सांस्कृतिक कार्यक्रमांवर सरकारचे निर्बंध कायम आहेत. तसेच दोन्ही वर्षाचे साहित्य संमलेनाचे अध्यक्ष फादर फ्रान्सिस दिब्रेटो आणि डॉ.जयंत नारळीकर यांनी तब्येतीच्या कारणाने कार्यक्रमास उपस्थित राहण्यास असमर्थता दर्शविल्याने सर्व पुरस्कारप्राप्त साहित्यिक कलाकारांना घरी जावूनच सन्मानित करण्याचा निर्णय माजी मंत्री आमदार राधाकृष्ण विखे पाटील यांच्या मार्गदर्शनाखाली प्रवरा परिवाराने घेतला.
संगमनेर तालुक्याचे भूमिपुत्र आणि ज्येष्ठ नाट्य दिग्दर्शक डॉ.सोमनाथ मुटकुळे यांच्या ‘पुन्हा क्रांतीज्योती’ या साहित्य कृतीस आणि संगमनेर महाविद्यालयातील मराठीचे विभागप्रमुख प्रा.डॉ.अशोक लिंबेकर यांच्या ‘वय कोवळे उन्हाचे’ या ललित लेख संग्रहास अहमदनगर जिल्हा उत्कृष्ट साहित्य पुरस्काराने गौरविण्यात आले. सन्मानचिन्ह व 10 हजार रुपये असे या पुरस्काराचे स्वरूप आहे. या दोन्ही पुरस्कार्थींचा गौरव डॉ.विखे पाटील कारखान्याचे संचालक कैलास तांबे, डॉ.दिनकर गायकवाड, प्रवरा सहकरी बँकेचे अध्यक्ष अशोक म्हसे, प्रवरा ग्रामीण शिक्षण संस्थेचे संचालक किशोर नावंदर यांनी प्रवरा परिवाराच्यावतीने निवासस्थानी जावून केला. माजी मंत्री आमदार राधाकृष्ण विखे पाटील, ज्येष्ठ नेते माजी मंत्री अण्णासाहेब म्हस्के, खासदार डॉ.सुजय विखे पाटील, जिल्हा परिषदेच्या माजी अध्यक्षा शालिनी विखे पाटील, प्रवरा अभिमत विद्यापीठाचे कुलपती डॉ.राजेंद्र विखे पाटील, पुरस्कार निवड समितीचे अध्यक्ष प्रा.डॉ.रावसाहेब कसबे, समितीचे निमंत्रक प्रा.डॉ.राजेंद्र सलालाकर यांनी डॉ.मुटकुळे आणि प्रा.डॉ.लिंबेकर यांचे अभिनंदन केले.

पद्मश्रींनी ग्रामीण भागात उभे केलेले काम हे पुरोगामी विचारांची बांधणी करणारे आहे. त्यामुळे त्यांच्या नावाने मिळालेला पुरस्कार नवी प्रेरणा देणारा वाटतो. कारण संत तुकाराम महाराज आणि क्रांतीज्योती सावित्रीबाई फुले यांच्यावर मी केलेले लिखाण हे पुरोगामित्वाचा विचार पुढे घेवून जाणारे आहे.
– डॉ.सोमनाथ मुटकुळे, संगमनेर

महाराष्ट्राच्या साहित्य क्षेत्रातील प्रतिष्ठेचा व अग्रगण्य म्हणून लौकिकअसलेल्या पुरस्काराने शिक्षक दिनी माझा सन्मान व्हावा याचा मला विलक्षण आनंद झाला आहे. प्रवरा परिवाराच्या कल्पक नियोजनाचा मला अभिमान वाटतो.
– प्रा.डॉ.अशोक लिंबेकर, संगमनेर