संगमनेर तालुका पोलिसांची दमदार कारवाई! वृद्धेचा निर्घुण खून करणार्यास अवघ्या आठ दिवसांतच अडीचशे किलोमीटरवर अटक.. प्रेयसीला शिवीगाळ केल्याच्या रागातून प्रियकराने केली होती गळा आवळून हत्या..
नायक वृत्तसेवा, संगमनेर
गेल्या आठ दिवसांपूर्वी 19 जानेवारी रोजी भरदुपारी तालुक्यातील कौठे कमळेश्वर येथे झालेल्या खूनाचा उलगडा करण्यात यश मिळविले आहे. या प्रकरणी संशयित आरोपीला संगमनेरपासून अडिचशे किलोमीटर अंतरावरील जालना जिल्ह्यातून अटक करण्यात आली असून जिल्हा न्यायालयाने त्याला सात दिवसांच्या पोलीस कोठडीत पाठवले आहे. चार वर्षांची लहानशी मुलगी वगळता कोणीही प्रत्यक्षदर्शी नसतांना तालुका पोलिसांनी कसोशीने तपास करुन अवघ्या आठच दिवसांत या खूनाचा तपास करुन आरोपीला जेरबंद केल्याने तालुक्यातून पोलिसांचे कौतुक होत आहे.
याबाबत तालुका पोलिसांकडून प्राप्त झालेल्या माहितीनुसार गेल्या 19 जानेवारी रोजी तालुक्यातील कौठे कमळेश्वर शिवारातील सावित्राबाई मोगल शेळके (वय 65) या वृद्ध महिलेचा अंगावरील दागिन्यांसाठी खून झाल्याचे समोर आले होते. या प्रकरणात आरोपीने त्यांच्या अंगावरील अडिच तोळे वजनाचे दागिने घेवून पोबारा केला. याच दरम्यान या वृद्धेच्या गोळ्या-बिस्किटाच्या छोटेखानी दुकानात खाऊ घेण्यासाठी एक चार वर्षीय लहान मुलगी आली. तिच्या कानातील बाळ्यांवरही ‘त्या’ चोरट्याची नजर पडली आणि त्याने क्षणाचाही विचार न करता त्या चिमुकलीच्या कानातील बाळ्या अक्षरशः ओरबाडून घेतल्या. येथेच या प्रकरणाला वाचा फुटली, मात्र दरम्यानच्या काळात संशयित आरोपी तेथून सहिसलामत पसार झाला.
या घटनेनंतर तालुका पोलीस निरीक्षक पांडूरंग पवार यांनी पथकासह तत्काळ घटनास्थळी पोहोचून तपासाला सुरुवात केली. पोलीस अधीक्षक मनोज पाटील, अप्पर अधीक्षक दीपाली काळे व उपअधीक्षक राहुल मदने या सारख्या वरीष्ठ अधिकार्यांनी घटनास्थळी धाव घेत तपासाला दिशा देण्याचे काम केले. तर स्थानिक गुन्हे शाखेचे निरीक्षक अनिल कटके यांनीही या गुन्ह्याचे पैलू हुडकण्याचा प्रयत्न केला. या सगळ्यांचा परिणाम कोणताही प्रत्यक्ष साक्षीदार नसतांनाही पोलिसांनी केवळ गुन्हेगारच नव्हे तर त्यामागील संपूर्ण घटनाक्रमच उलगडून समोर आणला.
मयत वृद्ध महिला 18 जानेवारी रोजी तिची आतेसून अश्विनी दत्तात्रय पंडित (वय 19, रा.फत्तेबाद, श्रीरामपूर हल्ली मंठा, ता.जालना) हिच्याकडे गेली होती. यावेळी दोघींमध्ये काही कारणावरुन कडाक्याचे भांडण झाले. त्यातून संबंधित वृद्धेने तिला मारहाण व शिवीगाळ केली. त्या रागाच्या भरातच ती वृद्धा तेथून संगमनेरला निघून आली. या सगळ्या प्रकाराचा अश्विनी पंडितला राग आल्याने तिने सदरची घटना आपला प्रियकर भाऊसाहेब उर्फ भावड्या झुंबर येलमामे (वय 30, रा.मिरपूर, ता.संगमनेर) याला सांगून म्हातारीचा बेत बघण्यास सांगीतले.
या घटनेच्या दुसर्याच दिवशी संशयित आरोपी भाऊसाहेब येलमामे कौठे कमळेश्वरमध्ये आला व त्याने ठरल्याप्रमाणे आपल्या प्रेयसीच्या अपमानाचा बदला म्हणून थेट त्या वृद्धेचा जीवच घेतला, हा प्रकार चोरी अथवा दरोड्याचा भासवण्याचाही पुर्ण प्रयत्न झाला. मात्र तो पोलिसांना फारकाळ अंधारात ठेवू शकला नाही. त्या लहान मुलीकडून केवळ काळा शर्ट घातलेला माणूस इतकीच तोकडी माहिती पोलिसांकडे होती. त्या आधारावर पोलिसांनी कौठे कमळेश्वर, मेंढवण, मिरपूर, तळेगाव, लोहारे व कासारे या सर्व ठिकाणी शोध घेतला. खबर्यांचे जाळे विणले व तांत्रिक तपासावर भर देत अवघ्या आठच दिवसांत थेट संगमनेरपासून अडिचशे किलोमीटर अंतरावरील जालना जिल्ह्यातील मंठा तालुक्यात छापा घालीत खून करणारा प्रियकर आणि तसे करायला सांगणारी प्रेयसी या दोघांच्याही मुसक्या आवळल्या.
या दोघांनाही जिल्हा न्यायालयाने सात दिवसांच्या पोलीस कोठडीत पाठवले आहे. आज सायंकाळी पोलीस उपअधीक्षक राहुल मदने व पोलीस निरीक्षक पांडूरंग पवार यांनी पत्रकार परिषद घेवून याबाबत सविस्तर माहिती दिली. आज सकाळी राजूरच्या दिशेने निघालेल्या पोलीस अधीक्षक मनोज पाटील यांनी तालुका पोलीस ठाण्याला भेट देत सर्वांचे कौतुकही केले. ही वार्ता तालुक्यातही पोहोचल्याने अनेकांनी पोलिसांच्या जलद तपासाचे कौतुकही केले आहे.
