राज्याच्या राजकारणात विखे पाटलांचा वाढता दबदबा! मनोज जरांगेंकडूनही कौतुकासह शिक्कामोर्तब; विखेंच्या ‘पॉवर पॉलिटिक्स’ची राज्यभर चर्चा ..

नायक वृत्तसेवा, संगमनेर
अहिल्यानगर स्थानिक स्वराज्य संस्था मतदारसंघाची निवडणूक नुकतीच बिनविरोध पार पडली आणि या निवडणुकीच्या माध्यमातून जिल्ह्याच्या राजकारणात जलसंपदामंत्री राधाकृष्ण विखे पाटील यांचे राजकीय स्थान किती भक्कम आहे हे पुन्हा एकदा सिद्ध झाले आहे. या बिनविरोध निवडीनंतर राहुरी येथे आयोजित एका कार्यक्रमात विधानपरिषदेचे नूतन आमदार आणि माजी राज्यमंत्री प्राजक्त तनपुरे यांनी थेट मंत्री विखे पाटील यांच्या राजकीय डावपेचांचे भरभरुन कौतुक केले. इतकेच नव्हे तर, आपल्या या विजयाचे संपूर्ण श्रेयही त्यांनी विखे पाटील यांना दिले आहे. या निवडणुकीच्या निमित्ताने विखे पाटलांनी पडद्यामागून ज्या पद्धतीने सूत्रे हलवली, त्यामुळे ते कशा झटपट पद्धतीने ‘माजी’चे ‘विद्यमान’ आमदार झाले, याचा रंजक किस्साच त्यांनी जाहीरपणे सांगून विखे पाटलांच्या राजकीय कौशल्याला दाद दिली आहे.

सुरुवातीला या निवडणुकीची चर्चा झाली तेव्हा ती बिनविरोध करण्यासाठी माजी खासदार डॉ.सुजय विखे पाटील आणि अहिल्यानगरचे आमदार संग्राम जगताप यांनी घेतलेल्या पुढाकाराची मोठी चर्चा झाली होती. या दोघांच्या यशस्वी प्रयत्नांमुळे राजकीय वर्तुळात त्यांना ‘जय आणि विरु’ अशी उपमा देखील देण्यात आली होती. या दोन्ही नेत्यांनी स्थानिक पातळीवर सर्वपक्षीय नेत्यांशी संवाद साधून वातावरण निर्मिती केली हे खरे असले, तरी या संपूर्ण प्रक्रियेच्या मागे जलसंपदामंत्री राधाकृष्ण विखे पाटील यांचे प्रगल्भ राजकीय डावपेच आणि त्यांची मोठी ताकद उभी होती, यावर आता प्राजक्त तनपुरे यांच्या वक्तव्याने शिक्कामोर्तब झाले आहे.

मंत्री राधाकृष्ण विखे पाटील यांच्या राजकीय प्रवासाचा आणि त्यांच्या वाढत्या प्रभावाचा विचार केला तर गेल्या काही महिन्यांतील घडामोडी अत्यंत महत्त्वाच्या ठरतात. मराठा आरक्षणाचे प्रणेते मनोज जरांगे पाटील यांच्या अलिकडच्या आंदोलनादरम्यान राज्य सरकार मोठ्या कोंडीत सापडले होते. अशा अत्यंत संवेदनशील आणि तापलेल्या वातावरणात सरकारच्या वतीने विखे पाटलांनी जरांगे पाटील यांच्याशी केलेली चर्चा आणि वाटाघाटी प्रचंड यशस्वी ठरल्या. कडक उन्हाळ्यात आणि वाढत्या राजकीय उकाड्यात अत्यंत टोकाला जावू पाहणारे हे आंदोलन शांत करण्यात विखे पाटलांना यश आले. त्यांच्या या समंजस आणि मुत्सद्दी भूमिकेबद्दल खुद्द मनोज जरांगे पाटील यांनी सोशल मीडियाच्या माध्यमातून विखे पाटलांचे जाहीर अभिनंदन केले होते. ही घटना विखे पाटलांचे राज्यातील वजन अधोरेखित करणारी ठरली.

अहिल्यानगर जिल्ह्याचे राजकारण नेहमीच चुरशीचे आणि गटातटाचे राहिले आहे. मात्र, या निवडणुकीच्या निमित्ताने विखे पाटलांनी विविध राजकीय पक्षांच्या नेत्यांना एका व्यासपीठावर आणून किंवा त्यांना अनुकूल भूमिका घेण्यास भाग पाडून एक वेगळाच पॅटर्न तयार केला आहे. प्राजक्त तनपुरे यांच्यासारख्या कधीकाळच्या विरोधी गटातील नेत्याने जाहीर कार्यक्रमात विखे पाटलांच्या डावपेचांचे कौतुक करणे आणि स्वतःच्या विजयाचे श्रेय देणे, ही साधी गोष्ट नाही. यामुळे विखे पाटलांचे राजकीय स्थान केवळ त्यांच्या स्वतःच्या पक्षातच नव्हे, तर विरोधकांमध्येही किती आदराचे आणि प्रभावाचे आहे, हे स्पष्ट होते.

अहिल्यानगर स्थानिक स्वराज्य संस्था मतदारसंघाची ही बिनविरोध निवडणूक म्हणजे केवळ एका नेत्याची आमदारकी नव्हे, तर जलसंपदामंत्री राधाकृष्ण विखे पाटील यांच्या ‘पॉवर पॉलिटिक्स’चा हा विजय आहे. राजकारणात केवळ सत्तेवर असणे महत्त्वाचे नसते, तर विरोधकांनाही आपल्या कौशल्याचा आदर करायला लावणे ही खरी ताकद असते. विखे पाटलांनी ती ताकद या निवडणुकीत दाखवून दिली आहे.

मनोज जरांगे पाटलांचे आंदोलन शमवताना विखे पाटलांनी दाखवलेली मुत्सद्देगिरी आणि आता स्थानिक पातळीवरील विरोधकांना सोबत घेऊन निवडणूक बिनविरोध करण्याची त्यांची किमया, या दोन्ही गोष्टी त्यांच्या राजकीय प्रगल्भतेची साक्ष देतात. डॉ.सुजय विखे आणि संग्राम जगताप यांच्या ‘जय-विरु’ जोडीने जमिनीवर काम केले असले, तरी या सर्व नाटकाचे मुख्य दिग्दर्शक राधाकृष्ण विखे पाटीलच होते, हे आता लपून राहिलेले नाही. आमदार प्राजक्त तनपुरे यांनी राहुरीच्या कार्यक्रमात जो किस्सा सांगितला, तो केवळ कौतुकाचा भाग नसून विखे पाटलांच्या राजकीय वर्चस्वाची कबुलीच आहे. आगामी काळातील जिल्ह्याच्या आणि राज्याच्या राजकारणात विखे पाटलांचे वाढलेले वजन अनेक नवीन समीकरणांना जन्म देणारे ठरेल, यात शंका नाही.