पंतप्रधानांच्या वाढदिवसानिमित्त सरकारची घोषणा!

 पंतप्रधान नरेंद्र मोदी यांच्या जन्मदिवसानिमित्त ‘नमो उद्यान’ उभारण्यासाठी राज्य शासनाच्या वतीने संपूर्ण राज्यातील ३९४ नगरपरिषद व नगरपंचायतींना प्रत्येकी एक कोटी रुपयांचा विशेष निधी दिला जाणार असल्याची घोषणा राज्याचे उपमुख्यमंत्री तथा नगरविकास मंत्री एकनाथ शिंदे यांनी केली आहे. सुधारीत निकषांनुसार राज्यातील नगरपरिषदा आणि नगरपंचायतींना वैशिष्ट्यपूर्ण योजनेंतर्गत एका वर्षभरात हे नमो उद्यान विकसित करण्यासाठी अनुदान वितरित करण्यात येणार आहे.त्यात संगमनेर नगरपरिषदेचा समावेश करण्यात आला असून शहरातील नागरिकांसाठी सर्व अत्याधुनिक सुविधांयुक्त असे ‘नमो उद्यान’ उभारले जाणार आहे. या उद्यानाच्या माध्यमातून खऱ्या अर्थाने शहरातील नागरिकांचे जीवनमान उंचावण्यास मदत होणार आहे.

नमो उद्यान उभारणी स्पर्धेत सहभागी होणाऱ्या नगरपरिषद व नगरपंचायतींना प्रथम क्रमांक पाच, द्वितीय क्रमांक  तीन तर तृतीय क्रमांकासाठी एक कोटी रुपये असे बक्षीस जाहीर करण्यात आले आहे. या स्पर्धेत विजेत्या  नगरपरिषदा आणि नगरपंचायतींना वरील रकमेची बक्षिसे देऊन गौरव करण्यात येणार आहे.