आ.तांबेंचा ‘डबल गेम’ विखेंची गोची करण्यासाठी? कोणतेही काम मार्गी लावण्याची आपल्यात ताकद :आ.सत्यजित तांबे 

आ. सत्यजित तांबे यांच्या या वक्तव्याने अनेकांच्या भुवया उंचावल्या. वास्तविक सत्यजित तांबे आणि मुख्यमंत्री देवेंद्र फडणवीस यांचे चांगले संबंध आहेत, हे सर्वांना माहीत आहे. सत्यजित तांबे हे भाजपात येतील अशाही चर्चा अनेकदा ऐकायला येतात. कधीकधी माजी मंत्री बाळासाहेब थोरात हेही भाजपात येतील अशा अटकळी बांधल्या जातात परंतु तसे काहीच होताना सध्या तरी दिसत नाही. आता संगमनेर तालुक्यात थोरात आणि विखे या दोन्ही नेत्यात चांगलीच जुगलबंदी रंगली आहे. भोजापूर व निळवंडेच्या पाण्यावरून राजकारण पेटले आहे. आगामी स्थानिक स्वराज्य संस्थांच्या निवडणुकीपूर्वी या दोन्ही नेत्यांनी आपापले कार्यकर्ते ‘ॲक्टिव्ह’ केले आहेत. थोरात हे महायुतीचे मंत्री विखे पाटील, आ. अमोल खताळ यांच्यावर जोरदार टीका करतांना दिसतात. त्यातच आ. सत्यजित तांबे यांनी संगमनेर खुर्द येथील कार्यक्रमात केलेल्या वक्तव्यामुळे मुख्यमंत्री फडणवीस व तांबे यांच्यातील जवळकीची चांगलीच चर्चा सुरू झाली.

या सर्व प्रकारामुळे संगमनेर मधील मतदार ‘कन्फ्युज’ होण्याची शक्यता व्यक्त केली जात आहे. एकीकडे महायुतीच्या मोठ्या नेत्यांशी मित्रत्वाचे  सबंध ठेवण्याचे तर दुसरीकडे महायुतीच्या स्थानिक नेत्यांशी दोन हात करायचे अशी दुहेरी खेळी आ. तांबे करतांना दिसत आहेत. मुख्यमंत्री फडणवीस यांच्याशी असलेले संबंध जगजाहीर करून संगमनेरच्या जनतेला आश्वासित करणे व महायुतीच्या स्थानिक नेत्यांना कोंडीत पकडणे, संगमनेरच्या राजकारणावर परिणाम करणारे ठरणार आहे. फडणवीसांशी असलेले मैत्रीपूर्ण सबंध सांगून आ. सत्यजित तांबे यांनी मंत्री विखे व आ. खताळ यांची गोची तर केली नाही ना? मंत्री विखे पाटील यांच्यावर दबाव टाकण्याचा हा आ. तांबे यांचा प्रयत्न असावा अशी ही शक्यता व्यक्त केली जात आहे. परंतु या सगळ्या प्रकारानंतर खुद्द मुख्यमंत्री देवेंद्र फडणवीस या विषयावर काही बोलतील का? की गप्प राहतील, हेही पहावे लागणार आहे. संगमनेरच्या राजकारणात नेमकं कोण कोणाचा गेम करतेय हे येत्या काळात समजणारच आहे.