‘एकतर चोर वर शिरजोर’! जनतानगर हाणामारी प्रकरणात भलतीच बाजू आली समोर!! पाच जणांवर खुनाच्या प्रयत्नाचा गुन्हा; पहिल्या प्रकरणातील एकासह तिघे ताब्यात ..

खाजगी वादातून दोन गटात झालेल्या हाणामारीची दुसरी आणि धक्कादायक बाजू आता समोर आली आहे. शुक्रवारी सायंकाळी घडलेल्या किरकोळ प्रकारानंतर दुसऱ्या गटाने नियोजनबद्ध षडयंत्र रचून त्यातील दोघांना घुलेवाडीजवळ सुनसान भागात गाठले. यावेळी पाच जणांनी कोयता, लोखंडी रॉड आणि बेसबॉल स्टिकच्या दांड्यांचा मनसोक्त वापर करीत दोघांनाही अर्धमेले होईस्तोवर मारले. विशेष म्हणजे ज्यावेळी ते दोघेही रक्ताच्या थारोळ्यात मृत्यूच्या दारात होते, त्याचवेळी मारेकऱ्यातील एकाची पत्नी शहर पोलीस ठाण्यात ‘त्या’ दोघांसह अन्य आठ जणांविरोधात तक्रार दाखल करीत होती. हा प्रकार रात्रीच पोलिसांना समजला. त्यांनी रुग्णालयात जावून त्यांची भेटही घेतली, मात्र दोघेही आज दुपारी शुद्धीवर आल्याने पोलिसांनी रुग्णालयात जावून त्यांचा जवाब नोंदविला. त्यावरुन पाच जणांवर खुनाचा प्रयत्न आणि प्राणघातक शस्त्रांचा वापर करुन हल्ला करण्यासह दंगलीच्या कलमान्वये पा जणांवर गुन्हा दाखल करण्यात आला आहे. पोलिसांनी त्यातील दोघांना रात्रीच ताब्यात घेतले होते. आता गुन्हा दाखल झाल्याने त्यांना अटक करण्याची प्रक्रिया सुरु करण्यात आली आहे. तर पहिल्या प्रकरणातील मुख्य आरोपी वरद लक्ष्मण लोहकरे याला आज दुपारीच अटक करण्यात आली आहे. या घटनेतून जनतामधील रहिवाशांना ‘एकतर चोर वर शिरजोर’ या म्हणीचा अर्थही उलगडला आहे.