‘कंगना राणावत कोण आहे, हे मी ओळखत नाही’!

‘कंगना राणावत कोण आहे, हे मी ओळखत नाही’!
राज्यमंत्री प्राजक्त तनपुरेेंनी ‘त्या’ वक्तव्याचा घेतला चांगलाच समाचार
नायक वृत्तसेवा, राहुरी
‘कंगना राणावत कोण आहे, हे मी ओळखत नाही. मी तिचे काही ट्वीट जास्त बघत नाही. एखादी कुठली अभिनेत्री काहीतरी बोलते, मला वाटत नाही की ते गांभीर्याने घ्यायला हवे,’ असे वक्तव्य राज्यमंत्री प्राजक्त तनपुरे यांनी करतानाच मुंबई पोलिसांवर आरोप करणार्‍या कंगना राणावत यांच्या वक्तव्याचा समाचार घेतला. ते अहमदनगरमध्ये बोलत होते.

सुशांतसिंह प्रकरणात सातत्याने बोलणार्‍या कंगनाने मुंबई पोलिसांवर आरोप करीत त्यांच्याबद्दल वादग्रस्त वक्तव्य केले आहे. कंगनाच्या या वक्तव्याने मोठा गदारोळ सुरू आहे. शिवसेना, काँग्रेस, मनसेसह अनेकजण कंगनावर जोरदार टीका करीत आहे. आता राष्ट्रवादी पक्षाचे व राज्याचे उच्च व तंत्रशिक्षण राज्यमंत्री प्राजक्त तनपुरे यांनीही तिच्या वक्तव्याचा समाचार घेतला आहे. आज नगर येथील राष्ट्रवादी भवन येथे राज्यमंत्री तनपुरे हे एका कार्यक्रमानिमित्त आले होते. यावेळी त्यांना कंगना राणावत यांनी मुंबई पोलिसांबद्दल केलेल्या वक्तव्याबद्दल विचारले असता ते म्हणाले, ‘कंगना राणावत कोण आहे हे मी ओळखत नाही. मी काही जास्त त्यांचे ट्विट बघत नाही. मला त्यापेक्षा जास्त इतर महत्त्वाची कामे आहेत. आमच्या भागातील शेतकर्‍यांच्या समस्याचे विषय आहेत. त्यामुळे कंगना राणावत हिने काही ट्विट केले तर ते फार गांभीर्याने घेण्यासारखं मला वाटत नाही.’

मुंबई पोलिसांच्या विश्वासार्हतेबद्दल सांगायचे, तर मला त्यांच्याविषयी पूर्ण खात्री आहे व अभिमान आहे. तसेच राज्याच्या देखील पोलीस दलावर मला अभिमान असून त्यांच्या विश्वासार्हतेबद्दल कोणी काही बोलण्याची गरजच नाही, असा टोलाही तनपुरे यांनी लगावला. एखादी कुठली तरी अभिनेत्री काहीतरी बोलते ते गांभीर्याने घ्यावे असे मला वाटत नाही, असेही ते म्हणाले.