भावीनिमगावमध्ये थंड डोक्याने लहान भावाची केली हत्या! शेवगाव पोलिसांत खुनाचा गुन्हा दाखल; आरोपीचा शोध सुरू

नायक वृत्तसेवा, शेवगाव
घरात पैसे देण्यावरून दोन भावांत सतत वाद होत होते. लहान भाऊ सतत भांडत असे म्हणून रात्री तो अंगणात झोपला असता त्याच्या डोक्यात लोखंडी हत्याराने वार करून त्याचा खून केला. त्यानंतर आरोपीने घरात जाऊन कपडे बदलली, जेवणही केले आणि नंतर भावाचा मोबाईल घेऊन पळून गेला. थंड डोक्याने क्रूरपणे खूनाची ही घटना गुरुवारी (ता.14) रात्री शेवगाव तालुक्यातील भावीनिमगाव येथे घडली.

या प्रकरणी शेवगाव पोलिसांनी आरोपी संभाजी शिवाजी काळे याच्याविरूद्ध गुन्हा दाखल केला आहे. संभाजी आणि त्याचा धाकटा भाऊ संदीप शेवगाव तालुक्यातील भावीनिमगाव येथे राहतात. मोठा भाऊ संभाजी काही काम करीत नव्हता. एखाद्यावेळी तो बाहेर कोठे कामाला गेला तरीही घरी पैसे देत नव्हता. त्यावरून या दोघांत सतत वाद होत. गुरुवारी रात्री जेवण झाल्यानंतर संदीप अंगणात खाटेवर झोपला होता. रात्री सव्वाबाराच्या सुमारास काहीतरी आवाज आल्याने त्यांची आई जागी झाली. तेव्हा मोठा मुलगा संभाजी घरी आला होता. त्याच्या हातात काही तरी लोखंडी हत्यार होते. त्याने तो संदीपच्या डोक्यात मारत होता. त्यामुळे आईने धावत जाऊन त्याच्या हातातून ते हत्यार काढून घेतले. मात्र, त्याने संदीपच्या डोक्यात आधीच घाव घातले होते. त्यात संदीप रक्तबंबाळ झालेला होता. आईने त्याला उठवण्याचा प्रयत्न केला. मात्र, त्याची हालचाल बंद झाली होती.

या प्रकारानंतर संभाजी घरात गेला. अंगावरील कपडे बदलली. जेवण केले आणि संदीपचा मोबाईल घेऊन तेथून पळून गेला. तोपर्यंत आईने ही माहिती इतर नातेवाईक आणि नंतर पोलिसांना कळविली. पोलिसांनी गुन्हा दाखल केला असून आरोपीचा शोध सुरू आहे.