नेवाशात श्रीराम नवमीच्या पूर्वसंध्येला दोन गटांत वाद पोलीस हवालदारालाही धक्काबुक्की; पोलिसांत गुन्हे दाखल

नायक वृत्तसेवा, नेवासा
शहरात श्रीराम नवमीच्या पूर्वसंध्येला निघालेल्या मिरवणुकीदरम्यान काही तरुण झेंडा फडकवत असल्याने समोरासमोर काही काळ तणावाचे वातावरण निर्माण झाले होते. मिरवणुकीला गालबोट लागले असल्याने रामभक्तांमधून संताप व्यक्त केला गेला. काही वेळानंतर पोलीस फौजफाटा घटनास्थळी दाखल झाल्याने पुढील अनर्थ टळला.

याबाबत पोलीस हवालदार तुळशीराम गिते यांनी दिलेल्या फिर्यादीत म्हटले की, नेवासा शहरात शोभायात्रेमध्ये 1000 ते 1200 लोक हजर होते. डीजेही लावण्यात आलेला होता. या शोभायात्रेबाबत आयोजक मनोज पारखे यांना शोभायात्रेची परवानगी घेतली किंवा कसे याबाबत विचारपूस केली असता त्यांनी परवानगी घेतली नसल्याचे सांगितले. या यात्रेचे आयोजक अंकुश पंढुरे, कृष्णा डहाळे, संतोष कुटे, नितीन जगताप असल्याचे सांगितले. ही यात्रा बसस्थानक येथून खोलेश्वर गणपतीकडे घेवून जात असताना रस्त्याच्या उत्तरेकडील बाजूस असलेल्या किस्मत टी व ज्यूस या दुकानासमोरील रस्त्यावर काही मुस्लीम तरुण हातामध्ये हिरव्या रंगाचे कापड बांबूला बांधून जोरजोराने हलवत होते. ते पाहून शोभायात्रेतील हिंदू तरुण त्यांच्याकडे धावत जाऊन वाद घालू लागले. तेवढ्यात पोलीस तेथे पोहचले. तेव्हा रेहान शेख, फजल शेख, सोहेब पटेल, इमरान जमीर शेख, सद्दाम जमीर शेख, सलमान जमीर शेख, साहिल जहागिरदार व इमरान आत्तार हे हाता झेंडू घेऊन होते.

त्यांच्या हातातून झेंडा काढून घेण्याचा प्रयत्न केला. परंतु त्यांनी धक्काबुक्की केली म्हणून पोलीस हवालदार गिते मोबाईलमधून त्यांचे चित्रण करीत असताना त्यातील रेहान शेखने त्यांचा मोबाईल हिसकावून घेऊन फोडून नुकसान केले आणि सरकारी कामामध्ये अडथळा निर्माण केला. त्यानंतर ते सर्वजण झेंडे घेऊन तेथून पळून गेले. त्याचवेळी जमावातील कोणीतरी अल्ताफ ख्वाजा बागवान (वय 15) यास कोणीतरी काहीतरी डोक्यात मारुन जखमी केले असून त्यास काही लोक परस्पर दवाखान्यात घेऊन गेले आहेत. त्यावेळी तेथे जमलेल्या लोकांनी रस्त्यावर जोरदार गोंधळ करून दहशत निर्माण करण्याचा प्रयत्न केला. त्यामुळे कायदा-सुव्यवस्थेचा प्रश्न निर्माण झाला होता. रस्त्याच्या दोन्ही बाजूस असलेल्या दुकानादारांनी आपापली दुकाने भीतीने बंद केली. त्याचवेळी रस्त्यावरून येणारी जाणारी वाहने व रस्त्यावरील लोकांमध्ये प्रचंड पळापळ झाली. त्यानंतर पोलिसांनी जमलेल्या जमावाला तेथून पांगवले.

यावरुन आयोजक मनोज पारखे, अंकुश पंढुरे, कृष्णा डहाळे, संतोष कुटे, नितीन जगताप यांनी विनापरवाना श्रीरामनवमीनिमित्त शोभायात्रा काढून डीजे लावला. तसेच रेहान शेख, फजल शेख, सोहेब पटेल, इमरान जमीर शेख, सद्दाम जमीर शेख, सलमान जमीर शेख, साहिल जहागिरदार व इमरान आत्तार यांनी गैरकायद्याने मंडळी जमवून हिरव्या रंगाचा झेंडा फडकावला आणि सार्वजनिक रस्त्यावर हिंदू समाजातील तरुणांबरोबर वाद निर्माण केला. तसेच पोलिसांना धक्काबुक्की करत सरकारी कामामध्ये अडथळा आणला. तसेच हिंदू समाजातील ओंकार जोशी, दीपक परदेशी, कष्णा डहाळे, बाळासाहेब कोकणे व इतर 60 ते 70 जणांनी सार्वजनिक रस्त्यावर गोंधळ करुन दहशत निर्माण करण्याचा प्रयत्न केला. त्याबद्दल भारतीय दंडविधान कलम 353, 324, 143, 147, 149, 427, 323, 188 सह क्रिमिनल अमेनमेंट अ‍ॅक्ट कलम 7 प्रमाणे गुन्हा दाखल केला आहे. पुढील तपास पोलीस निरीक्षक बाजीराव पोवार करत आहेत.