विधानसभेला अध्यक्ष मिळाला तर भाजपचा कोणता तोटा? ः थोरात धूळवड निमित्ताने राज्याच्या राजकारणावर प्रसार माध्यमांशी संवाद

नायक वृत्तसेवा, संगमनेर
‘गेल्या वर्षभरापासून राज्याच्या विधानसभेला अध्यक्ष नाही. ही निवड होऊ नये, यासाठी भाजपचे प्रयत्न सुरू आहेत. या मुद्द्यावर भाजपने न्यायालयात धाव घेतली आहे,’ असा आरोप काँग्रेसचे नेते, महसूल मंत्री बाळासाहेब थोरात यांनी केला. ‘विधानसभेला अध्यक्ष मिळाला तर भाजपचा कोणता तोटा होणार आहे?’ असा सवालही थोरात यांनी केला आहे.

धूळवडीच्या निमित्ताने प्रसारमाध्यमांशी बोलताना थोरात यांनी राज्याच्या राजकारणावर भाष्य केलं. थोरात म्हणाले, आपल्याकडं धूळवडीचा सण वर्षातून एकदाच साजरा केला जातो. मात्र, मागील काही दिवसांपासून राज्यात दररोज राजकीय धूळवड खेळली जात आहे. व्यक्तीद्वेष आणि व्यक्तिगत आरोपांची राळ उडविली जात आहे. अशी राजकीय धूळवड लोकशाहीला अभिप्रेत नाही. काँग्रेसनं पक्षांतर्गत फेरबदल करण्यासाठी विधानसभेचे तत्कालीन अध्यक्ष नाना पटोले यांचा त्या पदाचा राजीनामा घेऊन त्यांच्याकडं पक्षाचे प्रदेशाध्यक्षद सोपविले. तेव्हापासून अध्यक्षपदाची निवडणूक रखडली आहे. यासाठी महाविकास आघाडीनं बदललेल्या नियमांना मंजुरी मिळाली नाही. त्यातच या विरोधात भाजपनं न्यायालयातही धाव घेतली आहे. हा धागा पकडून थोरात यांनी विधानसभा अध्यक्षपदाची निवडणूक रखडण्यामागं भाजपच असल्याचा आरोप केला.

राष्ट्रवादी काँग्रेसचे अध्यक्ष शरद पवार यांनी पक्षाच्या आमदारांसमोर बोलताना मी राज्यात भाजपचं सरकार पुन्हा येऊ देत नसतो, असं वक्तव्य केलं. त्याला थोरात यांनी सहमती दर्शविली. ‘पवार योग्यच बोलले आहेत. विधानसभा निवडणुकीच्या प्रचारात विरोधी पक्षनेते देवेंद्र फडणवीस मी पुन्हा येईन म्हणत होते. मात्र, ते तसे म्हणाले की ते पुन्हा येत नाहीत, हा अनुभव आहे’, असा टोलाही थोरात यांनी लगावला. माजी खासदार राजू शेट्टी महाविकास आघाडीतून बाहेर पडणार असल्याचं सांगत आहेत. यावर प्रतिक्रिया देताना थोरात म्हणाले, ‘महाविकास आघाडी ही किमान समान कार्यक्रमावर आधारित आहे. त्याची अंमलबजावणी करताना काही प्रमाणात दिरंगाई होऊ शकते. पण आम्ही किमान समान कार्यक्रमाची अंमलबजावणी करत आहोत.’