राज्यमंत्री तनपुरेंवरील कारवाईचा राष्ट्रवादी करणार निषेध आढावा बैठकीत निर्णय; ठामपणे पाठिशी उभे राहण्याचा निर्धार

नायक वृत्तसेवा, नगर
महाविकास आघाडी सरकारमधील मंत्री नवाब मलिक यांना ईडीकडून अटक झाल्यानंतर राष्ट्रवादी काँग्रेसने जसा रस्त्यावर उतरून निषेध केला, तसाच निषेध राष्ट्रवादीचे राज्यमंत्री प्राजक्त तनपुरे यांच्यावरील कारवाईच्या निषेधार्थही करण्यात येणार आहे. अहमदनगरचे पालकमंत्री हसन मुश्रीफ आणि पक्षनिरीक्षक अंकुश काकडे यांच्या उपस्थित नगरमध्ये झालेल्या बैठकीत हा निर्णय घेण्यात आला. स्वत: तनपुरे मात्र या बैठकीला उपस्थित नव्हते.

मलिक यांच्या अटकेनंतर केवळ राष्ट्रवादी काँग्रेसचे नव्हे तर महाविकास आघाडीतील सर्वच पक्षांनी पुढे येऊन कारवाईचा निषेध केला. मलिक अद्याप तुरुंगाताच आहेत. तोपर्यंत नगर जिल्ह्यातील राज्यमंत्री तनुपुरे यांच्या साखर कारखान्यावर इडीने जप्तीची कारवाई केली आहे. त्यामुळे याचे राजकीय पडसादही उमटले आहेत. तनपुरे राष्ट्रवादीचे काँग्रेसचे प्रदेशाध्यक्ष जयंत पाटील यांचे भाचे आहेत. भाजपचे ज्येष्ठ नेते शिवाजी कर्डिले यांचा पराभव करून तनपुरे प्रथमच विधानसभेला निवडून आले. त्यामुळे त्यांना लगेच मंत्रिपदही मिळाले. त्यांच्याविरूद्ध झालेली ईडीची कारवाई चुकीची असल्याचे सांगून पक्षाने त्यांच्या पाठीशी उभे राहण्याचे ठरविले आहे. राष्ट्रवादी काँग्रेसची नगरमध्ये आढावा बैठक होती. या बैठकीला पालकमंत्री हसन मुश्रीफ, पक्षनिरीक्षक अंकुश काकडे, आमदार आशुतोष काळे, जिल्हाध्यक्ष राजेंद्र फाळके, जिल्हा परिषदेच्या अध्यक्ष राजश्री घुले, महिला अध्यक्षा मंजुषा गुंड, कार्याध्यक्ष संदीप वर्पे, अविनाश आदिक, शहराध्यक्ष माणिक विधाते, घनश्याम शेलार उपस्थित होते.

या बैठकीत बोलताना काकडे यांनी तनपुरे यांच्यावरील कारवाईचा निषेध केला. केंद्र सरकार सूडबुद्धीने कारवाई करीत असल्याचा आरोप त्यांनी केला. ही कारवाई चुकीची असून याविरोधात पक्षातर्फे जिल्हाधिकारी कार्यालयासमोर आंदोलन करून आपला निषेध नोंदवावा, असे आवाहन केले. याला सर्वांनी हात उंचावून प्रतिसाद दिला. राष्ट्रवादी काँग्रेस तनपुरे यांच्या पाठीशी ठामपणे उभी राहणार आहे. लवकरच कारवाईच्या निषेधार्थ जिल्हाधिकारी कार्यालयासमोर आंदोलन करण्यात येणार असल्याचे यावेळी जाहीर करण्यात आले. यासंबंधी स्वत: तनपुरे यांनी अद्याप काहीही प्रतिक्रिया दिलेली नाही. या पूर्वनियोजित बैठकीलाही ते उपस्थित राहिले नाहीत. त्यांच्या वांबोरी येथील कारखान्याच्या व्यवस्थापनाने मात्र भूमिका स्पष्ट केली आहे. या व्यवहरात काहीही गैर झालेले नाही. आमची बाजू आम्ही न्यायालयात मांडणार असल्याचे सरव्यवस्थापक विकास आभाळे यांनी कालच सांगितले आहे.