संगमनेर दूध संघाच्या अध्यक्षपदी रणजीतसिंह देशमुख तर उपाध्यक्षपदी राजेंद्र चकोर यांची बिनविरोध निवड
नायक वृत्तसेवा, संगमनेर
महसूल मंत्री नामदार थोरात यांच्या नेतृत्वाखाली राज्यात अग्रमानांकित असणार्या संगमनेर तालुका सहकारी दूध उत्पादक संघाची 2022-2027 या पंचवार्षिककरीता बिनविरोध निवडणूक रविवारी (ता.27) पार पडली. यामध्ये अध्यक्षपदी रणजितसिंह देशमुख यांची फेरनिवड तर उपाध्यक्षपदी राजेंद्र चकोर यांची एकमताने निवड करण्यात आली आहे.
संगमनेर तालुका सहकारी दूध संघाच्या अतिथीगृहामध्ये निवडणूक निर्णय अधिकारी उपनिबंधक गणेश पुरी यांच्या अध्यक्षतेखाली झालेल्या बैठकीत ही निवड एकमताने करण्यात आली. यावेळी महसूल मंत्री बाळासाहेब थोरात, शेतकरी विकास मंडळाचे अध्यक्ष बाजीराव खेमनर, इंद्रजीत थोरात, कारखान्याचे अध्यक्ष बाबासाहेब ओहोळ यांच्या उपस्थितीत ही निवड झाली. रणजितसिंह देशमुख यांच्या नावाची सूचना लक्ष्मण कुटे यांनी मांडली तर विलास कवडे यांनी अनुमोदन दिले. आणि उपाध्यक्ष राजेंद्र चकोर यांच्या नावाची सूचना संतोष मांडेकर यांनी मांडली तर भास्कर सिनारे यांनी अनुमोदन दिले. यावेळी नवनिर्वाचित संचालक लक्ष्मण कुटे, आर. बी. रहाणे, विलास वर्पे, भास्कर सिनारे, संतोष मांडेकर, विलास कवडे, बबन बोर्हाडे, बादशहा वाळुंज, संजय पोकळे, विक्रम थोरात, विष्णू ढोले, तुकाराम दातीर, रवींद्र रोहोम, प्रतिभा जोंधळे, मंदा नवले, कार्यकारी संचालक डॉ. प्रताप उबाळे आदी उपस्थित होते.
संगमनेर तालुका दूध संघाने अत्यंत कठीण परिस्थितीतून वाटचाल करताना नावलौकिक मिळवला आहे. दुष्काळी परिस्थितीत जोडधंदा म्हणून या दूध संघाने ग्रामीण विभागात आर्थिक समृद्धी निर्माण केली आहे. संगमनेरचा सहकार हा राज्यात सर्वात चांगला असून सर्व सहकारी संस्था या सर्वसामान्यांच्या विकासासाठी काम करत आहे. तालुक्याचे सलग आठव्यांदा प्रतिनिधीत्व करताना कारखाना, दूध संघ या महत्त्वाच्या संस्थांच्या बिनविरोध निवडी झाल्या. तर जिल्हा बँकेची निवडणूक ही यशस्वी झाली. आगामी काळात दूध व्यवसायात मोठी स्पर्धा आहे. खासगीवाले या धंद्यामध्ये मोठ्या संख्येने आहेत. त्यांना कायद्याची बंधने नाहीत. मात्र सहकाराला मोठे बंधने आहेत. तरीही गुणवत्तेने काम करून आपल्या नावलौकिकप्रमाणे आगामी काळात काम करावे असे सांगताना नवीन पदाधिकार्यांच्या कामाला व मागील संचालक मंडळानेही अत्यंत चांगले काम केले असल्याने सर्वांना महसूल मंत्री बाळासाहेब थोरात यांनी शुभेच्छा दिल्या.
महसूल मंत्री बाळासाहेब थोरात यांच्या नेतृत्वाखाली संगमनेरच्या समृद्ध सहकाराची परंपरा आपण यापुढेही जपणार असून अत्यंत सचोटीने व काटकसरीने दूध संघाच्या भरभराटीसाठी आपण काम करू. दूध व्यवसाय हा शेतकर्यांच्या जीवनाशी अत्यंत निगडीत असल्याने त्यांना जास्तीत जास्त मदत मिळवून देण्यासाठी काम करू असा विश्वास नूतन अध्यक्ष रणजीतसिंह देशमुख यांनी व्यक्त केला. यावेळी अमित पंडित, संपत डोंगरे, उपसभापती नवनाथ आरगडे, जिल्हा परिषद सदस्य अजय फटांगरे, गणपत सांगळे, सुभाष आहेर, साहेबराव गडाख, संपत गोडगे, अण्णा राहिंज, भारत मुंगसे, संतोष हासे, कार्यकारी संचालक जगन्नाथ घुगरकर, डॉ. गंगाधर चव्हाण, देवराम गुळवे, बापूसाहेब गिरी, व्यवस्थापक गणपत शिंदे, सुरेश जोंधळे, रमेश कोळगे यांसह विविध पदाधिकारी उपस्थित होते. प्रास्ताविक कारखान्याचे अध्यक्ष बाबासाहेब ओहोळ यांनी केले तर उपाध्यक्ष संतोष हासे यांनी आभार मानले.
