शिर्डी नगरपंचायतचे नगरपरिषदेत रुपांतर झाल्याने जल्लोष! सर्वपक्षीय नेत्यांसह ग्रामस्थांचा मिरवणुकीत लक्षणीय सहभाग

नायक वृत्तसेवा, शिर्डी
शिर्डी नगरपंचायतीचे रुपांतर नगरपरिषदेत झाल्याचे समजताच शुक्रवारी (ता.18) शहरातील सर्वपक्षीय नेते व ग्रामस्थांनी नगरपंचायत कार्यालयासमोर एकत्रित येऊन साईनामाचा जयघोष केला. याचबरोबर फटाक्यांची जोरदार आतिषबाजी करून गावातून मिरवणूक काढत जल्लोष साजरा केला. दरम्यान, शिर्डी नगरपंचायतचे रुपांतर नगरपरिषदेत झाल्याचा आनंद शिर्डीकरांनी जल्लोषात व्यक्त केला असला तरी शासन स्तरावर याबाबत वृत्त लिहेपर्यंत कुठलाही अध्यादेश प्राप्त झाला नव्हता. नगरपरिषद झाल्याची माहिती ऐकीव व वास्तव असली तरी याबाबतचा अध्यादेश केव्हा निघतो व शिर्डीकरांना केव्हा प्राप्त होतो याबाबत मोठी उत्सुकता असून याकडे समस्त ग्रामस्थांचे लक्ष लागून आहे.

शिर्डी नगरपंचायत ऐवजी नगरपरिषद व्हावी या मागणीसाठी अपवाद वगळता शहरातील सर्वपक्षीय नेते व नागरिकांनी नगरपंचायत निवडणुकीवर बहिष्कार टाकला होता. यामुळे शिर्डी ग्रामस्थांच्या एकजुटीला व सामूहिक प्रयत्नांना अखेर यश आले. नगरपंचायतचे रुपांतर नगरपरिषदेत झाल्याची वार्ता माजी मंत्री आमदार राधाकृष्ण विखे पाटील यांच्याकडून नगराध्यक्ष शिवाजी गोंदकर व शहरातील नागरिकांना शुक्रवारी सकाळी समजताच ग्रामस्थांनी साईनामाचा जयघोष करीत आनंद व्यक्त केला.

याप्रसंगी नगराध्यक्ष शिवाजी गोंदकर, कैलास कोते, नितीन कोते, विश्वस्त महेंद्र शेळके, कमलाकर कोते, रमेश गोंदकर, ज्ञानेश्वर गोंदकर, सुधाकर शिंदे, नीलेश कोते, सुजित गोंदकर, दादासाहेब गोंदकर, राजेंद्र कोते, सचिन शिंदे, अशोक कोते, अरविंद कोते, आप्पासाहेब कोते, प्रमोद गोंदकर, हरिश्चंद्र कोते, दत्तात्रय कोते, सुनील गोंदकर, गोपीनाथ गोंदकर, राकेश कोते, शब्बीर सय्यद, समीर शेख, सलीम शेख, साईराम गोंदकर, सोमनाथ कावळे, नरेश सुराणा, राम आहेर, अ‍ॅड. अविनाश शेजवळ, उमेश शेजवळ, अ‍ॅड. विक्रांत वाकचौरे, अमोल बानाईत, हरीराम राहाणे, शफीक शेख, नानासाहेब काटकर, स्वराज त्रिभूवन, अनिल पवार, गोटू गायकवाड आदी ग्रामस्थ उपस्थित होते.

शिर्डीकरांच्या सामूहिक प्रयत्नांना यश आले असून नगरपंचायतचे रुपांतर नगरपरिषदेत झाले आहे. सर्वपक्षीय नेत्यांचा पाठपुरावा, नगरविकास मंत्री एकनाथ शिंदे व महसूल मंत्री बाळासाहेब थोरात यांच्या सकारात्मक भूमिकेमुळे हा ऐतिहासिक निर्णय झाला आहे. यासाठी माजी मंत्री आमदार राधाकृष्ण विखे पाटील, साईबाबा संस्थानचे अध्यक्ष आमदार आशुतोष काळे, खासदार सदाशिव लोखंडे यांनी विशेष सहकार्य केल्याबद्दल सर्व ग्रामस्थांनी आभार मानले आहे.