निळवंडे कालव्यांसाठी अतिरिक्त 202 कोटींचा निधी मंजूर नाबार्डच्या अर्थसहाय्यातून कालव्यांच्या कामांना मिळणार गती
नायक वृत्तसेवा, संगमनेर
महसूल मंत्री बाळासाहेब थोरात यांनी निळवंडे कालव्याच्या कामासाठी सातत्याने महाविकास आघाडी सरकारकडून मोठा निधी मिळवला आहे. कोरोना संकटातही या कालव्यांच्या कामांचा वेग कायम ठेवला असून या कालव्यासाठी नाबार्ड अर्थसहाय्य योजनेतून 202 कोटी रुपयांचा अतिरिक्त निधी मिळवला असल्याची माहिती सहकारमहर्षी थोरात कारखान्याचे संचालक इंद्रजीत थोरात यांनी दिली आहे.
याबाबत अधिक माहिती देताना इंद्रजीत थोरात म्हणाले, निळवंडे धरण ध्यास पर्व मानून महसूल मंत्री बाळासाहेब थोरात यांनी हे धरण अनेक अडचणींवर मात करून पूर्ण केले आहे. दुष्काळी भागाला लवकरात लवकर पाणी मिळावे यासाठी महाविकास आघाडी सरकार सत्तेवर येताच पहिल्या दिवशी या कालव्याच्या कामाला गती दिली. सरकारकडून मोठा निधी उपलब्ध करून देत कोरोना संकटातही अत्यंत बारकाईने पाठपुरावा करून ही कामे वेगाने सुरू ठेवली. विविध ठिकाणी स्ट्रक्चरलची कामे झाली आहेत. 2022 मध्यापर्यंत दुष्काळी भागाला पाणी देण्याचा ध्यास नामदार थोरात यांनी ठेवला असून या सर्व कामी राज्याचे जलसंपदा मंत्री जयंत पाटील यांचेही मोठे सहकार्य लाभत आहे.
नामदार थोरात हे सलग सहा वर्ष कृषीमंत्री असताना नाबार्डचे विविध अधिकारी यांचे नामदार थोरात यांच्याशी घनिष्ठ संबंध राहिले आहेत. या स्नेहसंबंधामुळे नाबार्डच्या पथकाने या प्रकल्पाची पाहणी दिवाळीपूर्वी केली होती. हा प्रकल्प दीड वर्षात पूर्ण होत आहे हे लक्षात आल्यानंतर नाबार्डच्या पथकानेही समाधान व्यक्त केले होते. आणि त्यानंतर नाबार्ड अर्थसहाय्य योजनेमधून कालव्यांसाठी तातडीने 202 कोटी रुपयांचा निधी मंजूर केला आहे. या निधीमुळे कालव्यांच्या कामाची गती आणखी वाढणार आहे.
सध्या उजव्या व डाव्या दोन्ही कालव्यांची कामे अत्यंत वेगाने सुरू असून विविध ठिकाणी स्ट्रक्चरल कामे, नद्यांवरील पूल, खोदाई काम सुरू आहे. हा निधी मिळाल्याने या कामांचा वेग आणखी वाढणार आहे. जून 2021 मध्ये निळवंडे धरणालगतच्या महत्वपूर्ण ऐतिहासिक बोगदा नामदार थोरात यांच्या उपस्थितीत खुला करण्यात आला होता. त्यानंतर या विविध कामांवर जलसंपदा मंत्री व विविध संबंधित अधिकारी यांनीही भेटी दिल्या होत्या. कालव्यांच्या कामाचा नामदार थोरात हे सातत्याने आढावा घेत असून जलद गतीने काम होण्यासाठी सूचना करत आहेत. या सर्व कामांमध्ये अकोले तालुक्यातील नागरिकांचे मोठे सहकार्य लाभत आहे.