पाया जितका मजबूत तितकं भविष्य उज्वल : जागकर

संगमनेर तालुक्यातील आश्वी बुद्रुक  येथील अंगणवाडी केंद्रात झालेल्या ‘आनंद बाजार’ उपक्रमाच्या उद्घाटनप्रसंगी ग्रामपंचायत अधिकारी तथा ग्रामसेवक गौतम जागकर बोलत होते. आंगणवाडी केंद्रात शिक्षण आणि आनंद यांचा सुंदर संगम पाहायला मिळाला. केंद्रातील बालगोपालांनी ‘आनंद बाजार’चा मनसोक्त आनंद घेतला. हा उपक्रम केवळ मनोरंजनासाठी नव्हे, तर बालकांच्या सर्वांगीण विकासासाठी अनुभवाधारित शिक्षणाची प्रभावी साधना ठरला.

पुढे बोलतांनी त्यांनी सांगितले की, अशा उपक्रमांमुळे मुलांमध्ये आत्मविश्वास, सामाजिक जाण आणि व्यवहारकौशल्य विकसित होते. हेच खरे बालशिक्षणाचे उद्दिष्ट आहे.या उपक्रमात मुलांनी स्वतःच लहान दुकाने उभारली. भाजीपाला, फळे, खेळणी, मिठाई आणि दैनंदिन वस्तूंची विक्री करून व्यवहार कौशल्याचा सराव केला.  अंगणवाडी सेविका अलका ताजणे यांनी सांगितले की, बालकांना खेळत-खेळत शिकवणे ही शिक्षणाची सर्वोत्तम पद्धत आहे. ‘आनंद बाजार’सारखे उपक्रम मुलांच्या निरीक्षणशक्ती, आत्मविश्वास आणि सहकार्य वृत्ती वाढवतात.कार्यक्रमाच्या शेवटी सर्व बालगोपाळांना फळे व मिठाई वाटप करून कार्यक्रमाची सांगता करण्यात आली. मुलांच्या चेहऱ्यावरचा आनंद, त्यांचा आत्मविश्वास आणि शिकण्याची उमेद यामुळे संपूर्ण वातावरण आनंदमय बनले.यावेळी पालक राणी ताजणे,अर्पणा मांढरे, महेश मांढरे, विक्रांत ताजणे,शोभा शिंदे, कुलथे,अर्शद शेख, सागर जऱ्हाड या अंगणवाडी सेविका,पालक उपस्थित होते.