अमृतवाहिनीच्या पवित्र परिसरावर नशेबहाद्दरांचे वर्चस्व!

अलीकडच्या काही दिवसात प्रवरा नदीकाठच्या परिसरात वाळू तस्करांसोबतच नशेबाजांचा वावर वाढला आहे. रात्रीच्या अंधारात अनेक टोळ्या  घाट परिसरात बसून दारू पितात, अश्लील वर्तन करतात आणि नंतर लहान-मोठ्या गुन्हेगारी कृत्यांमध्ये सामील होतात, असे स्थानिक नागरिकांचे म्हणणे आहे.त्यामुळे या ठिकाणी गुन्हेगारी प्रवृत्ती वाढत असून, परिसरातील महिलांच्या सुरक्षेचा प्रश्नही निर्माण झाला आहे. या पार्श्वभूमीवर पालिकेकडून गंगामाई घाट परिसरात सीसीटीव्ही कॅमेरे बसवण्यात यावेत, पोलिसांची रात्रीची गस्त वाढवण्यात यावी, धार्मिक व सांस्कृतिक ठिकाणांचा सन्मान राखावा, येथे येणाऱ्या नशेबाज व गुन्हेगारी प्रवृत्तीच्या लोकांचा बंदोबस्त करून गंगामाई परिसर सुरक्षित करावा, अशी मागणी केली जात आहे. त्याचबरोबर जवळपास गेल्या महिनाभरापासून नगरपालिकेचे झाडू कर्मचारी व मुकादम घाट परिसरात फिरकलेले नाहीत. ठिकठिकाणी साचलेला कचरा व दारूच्या बाटल्या पाहून नागरिक संतप्त झाले आहेत. वारंवार तक्रारी करूनही पालिकेकडून कोणतीही ठोस कारवाई होत नाही.