संगमनेरच्या फ्लॉवरला परराज्यातून मोठी मागणी!  चांगला भाव मिळाल्याने शेतकरी आनंदी 

सध्या तालुक्यातील समनापुर फाटा तसेच साकुर हे गाव फ्लॉवर चे हब  बनले आहे. संगमनेर आणि साकुर येथील फ्लॉवरची दिल्ली, जयपुर, ग्वाल्हेर, गोरखपुर, लखनऊ, भोपाल, बनारस, कानपूर, अहमदाबाद, पटना या परराज्यातील शहरात मोठ्या प्रमाणात निर्यात केली जात आहे.  अनेक राज्यातील व्यापारी  संगमनेर येथे फ्लॉवर खरेदी करण्यासाठी येत असतात. येथील फ्लॉवरला अनेक ठिकाणावरून मोठ्या प्रमाणात मागणी आहे. साकुर भागात  माळराणावरील मुरमाट जमिनी असल्याने साकुर येथील  शेतीमालाला जास्त मागणी होत आहे. यावर्षी फ्लॉवरला २० रुपयापासून ते ३५ रुपये पर्यंत भाव असल्याने अनेक शेतकरी समाधानी आहेत. अजूनही फ्लॉवरला साकुर येथे २२ ते २५ रुपये किलोप्रमाणे भाव मिळत आहे तसेच संगमनेरला १८ ते २० रुपये किलो प्रमाणे भाव मिळत आहे.संगमनेरच्या तुलनेत साकुरच्या  मालाला जास्त मागणी असते.