वटपौर्णिमा, वृक्षमैत्रीचा संदेश देणारा सण : भाऊ जाखडी

वटसावित्री पौर्णिमेनिमित्त शहरातील सुतार गल्लीतील पुरोहित प्रतिष्ठानच्या कार्यालयात महिलांसाठी वटवृक्ष पूजनाचा विधीवत सोहळा आयोजित करण्यात आला होता. वेदमंत्रांच्या घोषात शास्त्रशुद्ध रीतीने वडाची विधीवत यथासांग पूजा महिलांच्या हस्ते करण्यात आली. त्यावेळी उपस्थित भगिनींना मार्गदर्शन करतांना जाखडी बोलत होते. या सोहळ्यात  विविध समाजांच्या  सामजिक कार्य करणाऱ्या महिला मंडळातील सदस्या  सहभागी झाल्या होत्या.वटवृक्षाचे आरोग्याच्या दृष्टीने असलेले असंख्य फायदे अभ्यासल्या नंतर आपल्या पूर्वजांनी वटवृक्ष जतन करणे, वृद्धिंगत करणे या हेतूने वटपौर्णिमा व्रताचा अंगीकार केला. सत्यवान आणि सावित्रीच्या कथेतून हाच संदेश देण्यात आला आहे की, मोठ्या प्रमाणात प्राणवायू देणारा जीवदान देण्याची क्षमता असलेला हा वृक्ष मानवाला वरदान आहे. अनेक वर्षांपासून सदर उपक्रमास भगिनी मोठ्या संख्येने प्रतिसाद देतात. त्यांनी पूजन केलेले वटवृक्षाचे रोप त्यांच्याच हस्ते अनेक ठिकाणी लागवड करण्यात येते. त्यामुळे मागील काही वर्षात मोठ्या प्रमाणात वृक्षारोपण करणे सहजपणे शक्य झाले आहे. नारीशक्ती किती किमया करू शकते हे यातून दिसून आले आहे. यावेळी अनेक भगिनींनी  पुरोहित प्रतिष्ठानच्या कार्याबद्दल गौरवोद्गार काढले.यावेळी पूरोहित प्रतिष्ठानचे उपाध्यक्ष संदीप वैद्य, अरुण कुलकर्णी, पवन काळे, प्रतीक जोशी आदी पुरोहित उपस्थित होते.