अमेरिकेत गुंजणार अकोलेच्या सुपुत्राच्या हार्मोनियमचा आवाज!

अपूर्व पेटकर हा वयाने खूप लहान असून  जागतिक ख्यातीचे हार्मोनियम वादक आणि अकोल्याचे भूमिपुत्र पंडित मुकुंद पेटकर यांचे पुत्र आहेत.१३ जून पासून अमेरिकेत सुरू होणाऱ्या या संगीत मैफिलीचे कार्यक्रम अमेरिकेतील फिनिक्स,शिकागो,लॉस एंजेलिस,सॅन जोस,सॅक्रमेंटो,वॉशिंग्टन,रिचमंड,न्यूयॉर्क,

न्यू जर्सी या शहरामध्ये २९ जून पर्यंत  असणार आहेत.

अपूर्व यांनी भारतीय शास्त्रीय संगीतातील पदवी आणि पदव्युत्तर पदवी भारती विद्यापीठ, पुणे येथून प्राप्त केली आहे.त्यांनी हार्मोनियम आणि संतूरचे स्वतंत्र कार्यक्रम महाराष्ट्र तसेच भारतभर सादर केले आहेत, तसेच पं. अरुण कशाळकर, रघुनंदन पणशीकर, पं. कुमार बोस, राहुल देशपांडे, समीर डुबेले यांसारख्या ज्येष्ठ कलाकारांसोबत संगत केली आहे. याशिवाय नागेश अडगावकर, दत्तप्रसाद रानडे, विनय रामदासन, श्रुती विश्वकर्मा, स्वर शर्मा यांसारख्या पुढच्या पिढीतील गुणी कलाकारांसोबतही त्यांनी काम केले आहे.शास्त्रीय संगीत क्षेत्रासोबतच अपूर्व यांनी चित्रपट आणि ध्वनिमुद्रण क्षेत्रातही कार्य केले आहे. त्यांनी नरेंद्र भिडे, कमलेश भडकमकर, सारंग कुलकर्णी, देवेंद्र भोमे, गंधार संगोराम यांसारख्या संगीत संयोजकांबरोबर काम केले आहे, तसेच प्रियंका बर्वे, हिमानी कपूर, जसराज जोशी, अवंती पाटील, समीरा कोप्पीकर, उज्वल गजबार यांसारख्या प्लेबॅक आणि बॉलिवूड कलाकारांसोबतही ते सादरीकरण करतात.

अपूर्व यांनी अनेक गीते, लघुपट, चित्रपट, डॉक्यु-सीरीज, जाहिराती आणि नाटकांसाठी संगीत रचना व निर्मिती केली आहे. हरिहरन, शंकर महादेवन, प्रियंका बर्वे यांच्याकडून गायलेली एक विशेष रचना मराठी भाषा अभिजात दिनानिमित्त देवेंद्र फडणवीस यांच्या हस्ते प्रकाशित झाली होती. याच वेळी ‘शांतता – मराठीचे कोर्ट चालू आहे’ या सामाजिक विषयावर आधारित चित्रपटासाठीही त्यांनी संगीत दिले आहे.गझल आणि कव्वाली यांचे बारकावे अपूर्व यांनी आत्मसात केले असून ते यांचे सादरीकरण, शिक्षण व संवर्धन भारतात करत आहेत. त्यांनी ३० पेक्षा अधिक गझल व कव्वाल्या रचल्या व सादर केल्या आहेत.  पर्शियन शास्त्रीय संगीतावरही अभ्यास करून भारतीय वाद्यांवर त्याचे सादरीकरण केले आहे. भाषांप्रती विशेष आकर्षण असल्याने ते पंजाबी, उर्दू आणि पर्शियन भाषेचा अभ्यास करत आहेत.अपूर्व समकालीन, आधुनिक जाझ, इलेक्ट्रॉनिक, अफ्रो-लॅटिन आणि जागतिक संगीत प्रकारांचा अभ्यास व सादरीकरण करत आहेत. त्यांनी केप टाऊन जाझ फेस्टिव्हल (केप टाऊन), इंटरनॅशनल जाझ डे, मॅग्नेटिक फील्ड्स फेस्टिव्हल, कला घोडा आर्ट्स फेस्टिव्हल, सॉयल फेस्टिव्हल (मनाली) इत्यादी ठिकाणी सादरीकरण केले आहे.  संजय दिवेचा, विनायक पोल, उमेश वऱभुवन यांसारख्या ख्यातनाम कलाकारांसोबतही काम केले आहे.अपूर्व यांना २० पेक्षा अधिक पुरस्कार मिळाले असून त्यांनी भारतभर तसेच परदेशातही विविध कार्यक्रमांतून, भारतीय शास्त्रीय संगीत, अर्धशास्त्रीय संगीत, नाट्यसंगीत, उर्दू साहित्य व कला, मराठी व बॉलिवूड संगीत, जाझ फेस्टिव्हल्स, इलेक्ट्रॉनिक, प्रयोगशील व समकालीन संगीतातून देश-विदेशात दौरे केले आहेत.