अमृतवाहिनी एमबीएचा आंतरराष्ट्रीय पातळीवर लौकिक ः थोरात महाविद्यालयामध्ये माजी विद्यार्थी मेळावा उत्साहात संपन्न

नायक वृत्तसेवा, संगमनेर
राष्ट्रीय स्तरावरील विविध मानांकने मिळवलेल्या अमृतवाहिनी एमबीएने गुणवत्तापूर्ण शिक्षणाचे सातत्य कायम राखले असून या संस्थेच्या माजी विद्यार्थ्यांच्या कार्यकर्तृत्वामुळे अमृतवाहिनी एमबीएचा आंतरराष्ट्रीय पातळीवर लौकिक निर्माण झाला असल्याचे गौरवोद्गार काँग्रेस विधीमंडळ नेते व माजी महसूल मंत्री आमदार बाळासाहेब थोरात यांनी काढले आहे.

अमृतवाहिनी एमबीएमध्ये 1997 च्या बॅचमधील माजी विद्यार्थ्यांचा मेळावा संपन्न झाला यावेळी ते बोलत होते. या कार्यक्रमाचे अध्यक्षस्थानी संस्थेच्या विश्वस्त शरयू देशमुख ह्या होत्या. तर व्यासपीठावर मुख्य कार्यकारी अधिकारी अनिल शिंदे, एमबीएचे संचालक डॉ. बी. एम. लोंढे आदी उपस्थित होते. याप्रसंगी श्रीलंका पेप्सी कंपनीचे नॅशनल हेड अमित जोशी, क्रॉक्स ग्रुपचे जॉय तालुकदार, एमएसआरटीसीचे संजय गायधनी, सॅमसंग इंडियाचे संजय खत्री, जिनस ब्रीडिंग इंडियाचे राजीवकुमार सिन्हा, कांकरिया ऑटोमोबाईलचे सचिन कोरडे, आकाश अ‍ॅडव्हर्टायझिंगचे हिमांशू पाठक यांसह आंतरराष्ट्रीय पातळीवर कार्यरत असणारे माजी विद्यार्थी उपस्थित होते.

यावेळी बोलताना आमदार थोरात म्हणाले, ग्रामीण भागात असूनही अमृतवाहिनी संस्थेने गुणवत्तेने आपला देशभर लौकिक निर्माण केला आहे. विद्यार्थ्यांच्या व्यक्तिमत्त्व विकासासाठी सातत्याने विविध उपक्रम राबविण्यात येत आहेत. गुणवत्ता आणि विविध उपक्रम यामुळे येथील विद्यार्थी हे ज्ञानाने परिपूर्ण असतात. यामुळे राष्ट्रीय आणि आंतरराष्ट्रीय पातळीवरील विविध कंपन्या कॅम्पस इंटरव्ह्यूसाठी येत असतात. यामधून अनेक विद्यार्थ्यांना नोकरीच्या सुविधाही उपलब्ध होत असतात. या संस्थेच्या माजी विद्यार्थ्यांनी देश-विदेशात आपल्या कार्यकर्तृत्वाने केलेल्या कामामुळे या संस्थेचा आंतरराष्ट्रीय पातळीवर गौरव होत असल्याचेही ते म्हणाले.

याप्रसंगी दुबईस्थित हॉटेल इंडस्ट्रीचे रियाज राज, श्रीलंकेतील पेप्सी कंपनीचे नॅशनल हेड अमित जोशी, संजय गायधनी, पंकज मुरपाणी, सचिन कोरडे आदिंसह विविध विद्यार्थ्यांनी मनोगत व्यक्त केले. या माजी विद्यार्थी मेळाव्याच्या आयोजनासाठी डॉ. बी. एम. लोंढे, समन्वयक डॉ एल. डी. शहा आणि सर्व शिक्षक व शिक्षकेतर कर्मचार्‍यांनी विशेष परिश्रम घेतले. या मेळाव्याच्या यशस्वीतेबद्दल संस्थेचे अध्यक्ष आमदार बाळासाहेब थोरात, आमदार डॉ. सुधीर तांबे, विश्वस्त शरयू देशमुख, इंद्रजीत थोरात, बाळासाहेब गुंजाळ, लक्ष्मण कुटे, मुख्य कार्यकारी अधिकारी अनिल शिंदे, व्यवस्थापक प्रा. धुमाळ यांनी अभिनंदन केले आहे.