देवळाली प्रवरा पालिकेने स्वतः कोविड सेंटर चालवावे! अन्यथा 10 जूनपासून आमरण उपोषण; आप्पासाहेब ढूस यांचा इशारा

नायक वृत्तसेवा, राहुरी
तालुक्यातील देवळाली प्रवरा येथील नगरपालिका इमारतीमध्ये सुरु असलेले खासगी कोविड सेंटर शासकीय करावे किंवा नागरिकांना मोफत सुविधा देण्यासाठी नगरपालिकेने स्वतः ते कोविड सेंटर चालवावे. अन्यथा पालिकेच्या प्रवेशद्वारासमोर 10 जूनपासून आमरण उपोषण करणार असल्याचा इशारा आंतरराष्ट्रीय खेळाडू आप्पासाहेब ढूस यांनी दिला आहे.

याबाबत जिल्हाधिकारी डॉ.राजेंद्र भोसले यांना पाठविलेल्या निवेदनात म्हटले आहे की, इमारत नगरपालिकेची, पाणी नगरपालिकेचे, वीज नगरपालिकेची, सफाई कामगार नगरपालिकेचे, मग कोविड सेंटरच खासगी का? असा देवळाली प्रवराच्या नागरिकांना प्रश्न पडला आहे. नगरपालिकेच्या मालमत्तेमध्ये खासगी कोविड सेंटर चालवून रुग्णाला भरमसाठ बिलाची आकारणी कशी काय करू शकता? असा सवाल आप्पासाहेब ढूस यांनी विचारुन तत्काळ हे कोविड सेंटर शासकीय करा नाहीतर ‘चले जाव आंदोलन’ छेडावे लागेल, असा इशारा दिला होता. तसेच चार दिवसांचे चाळीस हजार रुपये बिल भरायला पैसे नसल्याने या खासगी कोविड सेंटरमध्ये अडकून पडलेल्या देवळाली प्रवरा येथीलच रुग्णाला सोडवायला आंदोलन करायची वेळ आल्याने ढूस यांनी जिल्हाधिकार्‍यांना आमरण उपोषणाचे निवेदन दिले आहे.

देवळाली प्रवरा नगरपालिकेच्या इमारतीमध्ये सुरू असलेल्या खासगी कोविड सेंटरची माहिती मिळणे कामी संदर्भीय पत्रान्वये 13 मे रोजी पालिकेला विनंती केली आहे. तथापि आजपावेतो पालिकेने कोणतीही माहिती उपलब्ध करून दिली नाही. त्यामुळे पालिकेच्या इमारतीमध्ये सुरू असलेल्या खासगी कोविड सेंटरमध्ये कोरोना रुग्णांची लुटमार होत असल्याबद्दल खात्री झाली असून, तशा तक्रारी आमच्याकडे आलेल्या असल्याचे ढूस यांनी स्पष्ट केले आहे.

दरम्यान, कोरोनाची तिसरी लाट येण्यापूर्वी या खासगी कोविड सेंटरमध्ये आणखी काही खाटा वाढवून त्याचे शासकीय मोफत कोविड सेंटरमध्ये रुपांतर करावे किंवा नगरपालिकेने ते स्वतः चालवावे. याबाबत नगरपालिकेला वारंवार विनंती केली आहे. त्यावर पालिकेने अद्यापपावेतो कोणताही निर्णय घेतला नाही. तरी या खासगी कोविड सेंटरची पालिकेकडून माहिती मिळावी. या कोविड सेंटरची चौकशी करून दोषींवर योग्य ती कारवाई करावी आणि या सेंटरमध्ये आणखी काही खाटा वाढवून ते शासकीय सेंटर करावे. किंवा पालिकेने ते कोविड सेंटर स्वतः चालविसाठी आवश्यक ती उपाययोजना करावी. आणि येथील नागरिकांना मोफत सेवा उपलब्ध करुन कोरोनाची तिसरी लाट येण्यापूर्वी देवळाली प्रवरा परिसरातील नागरिकांना आश्वस्त करावे आदी मागण्यांसाठी गुरुवार दि. 10 जून, 2021 रोजी सकाळी 10 वाजेपासून मागण्या मान्य होईपर्यंत देवळाली प्रवरा नगरपालिकेच्या प्रवेशद्वारासमोर आमरण उपोषण करणार असल्याचा इशारा ढूस यांनी दिला आहे.