शिव महापुराण कथा सर्वात मोठी ठरणार : डॉ.सुजय विखे 

शिर्डी येथील अस्तगाव माथा परिसरात कथेचे आयोजन करण्यात आले असून, त्यासाठी जय्यत तयारी सुरू आहे. मंडप उभारणीचे काम युद्धपातळीवर सुरू असून, भाविकांसाठी बसण्याची सोय, पिण्याच्या पाण्याची सुविधा, पार्किंग आणि इतर सोयी-सुविधा जनसेवा फाउंडेशनच्या माध्यमातून करण्यात येत आहेत. कथेचे विशेष आकर्षण म्हणजे बारा ज्योतिर्लिंग आणि चारधाम दर्शनाचा देखावा, जो अत्यंत भव्य आणि दिव्य स्वरूपात साकारण्यात येणार आहे. देशभरातील विविध प्रांतांमधून येणाऱ्या भक्तांसाठी हा एक अनोखा आध्यात्मिक अनुभव ठरणार असल्याचे डॉ. विखे पाटील यांनी सांगितले.

११ ऑक्टोबर रोजी प्रदीप मिश्रा महाराजांचे शिर्डीत आगमन होणार असून, शिर्डी आणि राहाता शहरात त्यांच्या स्वागतासाठी भव्य मिरवणूक काढण्यात येईल. त्यानंतर ते लोणी येथील डॉ. विखे पाटील यांच्या निवासस्थानी मुक्कामी राहणार असून, १२ ते १६ ऑक्टोबर दरम्यान दररोज दुपारी एक ते चार या वेळेत कथा होणार आहे.

डॉ. सुजय विखे पाटील म्हणाले,  ही कथा  केवळ धार्मिक सोहळा नसून, अध्यात्म आणि एकतेचा उत्सव ठरणार आहे. भक्तांसाठी हे एक अविस्मरणीय अध्यात्मिक पर्व असेल. देशातील सर्वात मोठी शिव महापुराण कथा म्हणून याची नोंद होईल असा विश्वास असल्याचे ते म्हणाले.