पंतप्रधान स्वनिधी योजनेची कोपरगावकडून पालिकेकडून अंमलबजावणी

पंतप्रधान स्वनिधी योजनेची कोपरगावकडून पालिकेकडून अंमलबजावणी
192 लाभार्थ्यांना प्रत्यक्षात प्रत्येकी दहा हजार रुपयांप्रमाणे कर्जाचे वितरण
नायक वृत्तसेवा, कोपरगाव
केंद्र व राज्य शासन, नगर विकास विभाग यांच्या मार्गदर्शक सूचनांप्रमाणे कोपरगाव नगरपालिका दिनदयाळ अंत्योदय योजना-राष्ट्रीय नागरी उपजीविका अभियान विभाग आणि पालिकेचा बाजार विभाग यांच्या मार्फत शहरातील पथविक्रेत्यांचे कायम हंगामी व तात्पुरते या गटात 1 ऑगस्ट, 2019 ते 31 जानेवारी, 2020 या दरम्यान बायोमॅट्रिक पद्धतीने सर्वेक्षण करण्यात आले आहे. सदरील सर्वेक्षणामध्ये एकूण 1046 पथविक्रेत्यांची नोंदणी झाली आहे. आज अखेर शहरातील 536 पात्र लाभार्थ्यांनी ऑलाईन पद्धतीने अर्ज सादर केले आहेत. यापैकी 342 प्रस्तावांना संबधित बँकांनी ऑनलाईन पद्धतीने मंजुरी दिली आहे. मंजूर प्रस्तावांपैकी 192 लाभार्थ्यांना प्रत्यक्षात प्रत्येकी दहा हजार रुपयांप्रमाणे कर्जाचे वितरण करण्यात आले आहे. यामध्ये पंजाब नॅशनल बँक, बँक ऑफ इंडिया, स्टेट बँक ऑफ इंडिया या बँकांनी सर्वाधिक प्रस्ताव निकाली काढले आहेत. तसेच बँक ऑफ महाराष्ट्र, आयडीबीआय बँक आणि सेन्ट्रल बँक ऑफ इंडिया या सर्व बँकांनी या योजनेच्या अंमलबजावणीसाठी उत्स्फूर्त प्रतिसाद दिल्याने योजनेची अंमलबजावणी प्रगतीपथावर असल्याचे दिसून येत आहे.

महाराष्ट्र शासन नगर विकास विभाग शासन निर्णय क्र.पंतप्रधान स्वनिधी-2020-/प्र.क्र.77/नवि-20. दिनांक ः 17 जून, 2020 यानुसार उद्भवलेल्या कोविडच्या परिस्थितीमुळे पथविक्रेते यांचे उद्योग, व्यवसाय बंद झाल्यासारखेच आहे. त्यामुळे पथविक्रेते यांना आपला व्यवसाय सुरळीत चालू ठेवण्यासाठी भांडवलाचा पतपुरवठा बँकांमार्फत प्रदान करण्याबाबत मार्गदर्शक सूचना प्राप्त झालेल्या आहेत. शहरी फेरीवाला पथविक्रेता यांना सूक्ष्म पतपुरवठा करण्यासाठी मार्गदर्शक सूचनांप्रमाणे पात्र लाभार्थ्यांना बँकेमार्फत प्रती लाभार्थी रुपये दहा हजार इतके कर्ज उपलब्ध करून देण्यात येणार आहे. सदर प्रमाणे वितरीत झालेल्या कर्ज प्रस्तावांना 7 टक्के व्याज अनुदान लाभार्थ्यांनी नियमित कर्जाची परतफेड केल्यास दर तिमाही व्याज अनुदानाचा लाभ मिळणार आहे. तसेच फेरीवाले यांनी डिजिटल पद्धतीने व्यवहार केल्यास त्यांना प्रती महा शंभर रुपयांपर्यंतचा कॅशबॅकचा अतिरिक्त लाभ मिळणार आहे.

याकामी व योजनेच्या अंमलबजावणी नियंत्रणासाठी कोपरगाव शहर पातळीवर शासन निर्णयानुसार मुख्याधिकारी प्रशांत सरोदे यांच्या अध्यक्षतेखाली समिती स्थापन करण्यात आली आहे. सदर समिती योजनेच्या अंमलबजावणीकरिता दुवा/समन्वय म्हणून महत्वाची भूमिका निभावत आहे. सदर समितीच्या मार्गदर्शनाखाली शहरातील पथविक्रेता सर्वेक्षण यादीतील लाभार्थ्यांना ऑलाईन पद्धतीने अर्ज करण्याबाबत मार्गदर्शन करण्यात येत आहे.

तसेच सदर योजनेचा लाभ घेण्यासाठी ऑनलाईन पद्धतीने अर्ज करण्यासाठी लाभार्थ्याच्या आधारकार्ड सोबत त्याचा मोबाईल नंबर जोडलेला असणे आवश्यक आहे. तसेच आधारकार्ड बर्‍याच दिवसांपासून वापरात नसल्याने लाभार्थ्यांना अर्ज करण्यास अडचणी येतात. त्यासाठी पात्र लाभार्थ्यांनी आपले आधारकार्ड वापर अद्ययावत करावे व पंतप्रधान स्वनिधी योजनेचा लाभ घ्यावा असे मुख्याधिकारी प्रशांत सरोदे, नगराध्यक्ष विजय वहाडणे आणि उपनगराध्यक्ष स्वप्नील निखाडे यांनी आवाहन केले आहे.