बालविवाह रोखण्यासाठी उपाययोजना राबवू ः डॉ. लहामटे अकोलेत बालविवाह जनजागृती सायकल रॅलीचे जोरदार स्वागत

नायक वृत्तसेवा, अकोले
तालुक्यातील बालविवाहांचे प्रमाण कमी करण्यासाठी लवकरच बालविवाह प्रतिबंधक अधिकारी म्हणून कार्यरत असणार्‍या ग्रामसेवकांची व लग्नातील घटकांची बैठक घेऊन हे प्रमाण कमी करण्यासाठी उपाययोजना राबवू, अशी ग्वाही आमदार डॉ. किरण लहामटे यांनी दिली.

स्नेहालय युवा निर्माण, उडान प्रकल्प व रोटरी क्लब अकोले सेंट्रलच्यावतीने अकोले येथे बालविवाह जनजागृती अभियानाचे आयोजन करण्यात आले होते. यावेळी ते बोलत होते. अहमदनगरहून आलेल्या बालविवाह जनजागृती सायकल रॅलीचे जोरदार स्वागत करण्यात आले. उडान प्रकल्प अंतर्गत अकोले शहरातून बालविवाह जागृती व्हावी म्हणून प्रभात फेरी काढण्यात आली. बस स्थानकामध्ये नागरिकांत बालविवाह रोखण्याच्या दृष्टीने रॅलीमध्ये सहभागी झालेल्या विद्यार्थ्यांनी पथनाट्य सादर केले. त्यास उपस्थित जनतेने व प्रवाशांनी उत्स्फूर्त प्रतिसाद दिला. त्यानंतर अगस्ति महाविद्यालय येथे तरुणींसमोर पथनाट्य सादर केले. बालविवाहाचे तोटे तरुणींना सांगून ज्याठिकाणी बालविवाह होत असेल त्याठिकाणी बालविवाह रोखण्यासाठी प्रयत्न करावे असे आवाहन करण्यात आले. या पथनाट्यसही उत्तम प्रतिसाद दिला. यावेळी सांस्कृतीक कार्यक्रम, बेटी बचाव, बेटी पढाव अभियानाचे महत्व सांगितले.

दरम्यान, आमदार डॉ. लहामटे पुढे बोलताना म्हणाले, आपण तालुक्यातील सर्व ग्रामसेवकांची बैठक घेऊन गावात बालविवाह होणार नाही याची दक्षता घेण्याचे आदेश करू असे स्पष्ट केले. उडान प्रकल्प, स्नेहालय संस्थेचे व नेहमी सामाजिक उपक्रमात पुढे असलेल्या रोटरी क्लब अकोले सेंट्रलच्या कामांचे कौतुक करून या उपक्रमास शुभेच्छा दिल्या. यावेळी डॉ. संदीप कडलग, अकोले तालुका वकील बार असोसिएशनचे अध्यक्ष वसंत मनकर, शिवसेना नेते महेश नवले, साऊ महिला संस्थेच्या संयोजिका प्रतिभा कुलकर्णी, सेवानिवृत्त मुख्याध्यापक रामदास सोनवणे, रोटरी क्लब अकोले सेंट्रलचे अध्यक्ष सुनील नवले, सायकल असोसिएशनचे काळे, अमित वैद्य, उडान प्रकल्प समन्वयक प्रदीप कदम, विकास सुतार, रोटरी क्लब अहमदनगरचे नितीन थाडे, असुलता थाडे आदी उपस्थित होते. या सायकल रॅलीमध्ये ३५ मुली व २५ मुले यांनी सहभाग घेतलेला आहे. या सर्वांची राहण्याची व जेवणाची सोय रोटरी क्लबने केली. सूत्रसंचालन डॉ. संदीप कडलग यांनी केले तर आभार रोटरीचे सचिव विद्याचंद्र सातपुते यांनी मानले.