शिवसेनेचे 12 खासदार एकनाथ शिंदेंना पाठिंबा देणार? भाजपचे वर्ध्याचे खासदार रामदास तडस यांचा शिर्डीत दावा

नायक वृत्तसेवा, शिर्डी
शिवसेनेचे 12 खासदार एकनाथ शिंदेंना पाठिंबा देणार असल्याचा दावा भाजपचे वर्ध्याचे खासदार रामदास तडस यांनी केला आहे. शिवसेना आमदारांपाठोपाठ अनेक खासदार भाजपसोबत जाण्यास इच्छुक असल्याच्या चर्चा सुरू असतानाच तडस यांनी थेट आकडाच सांगितल्याने शिवसेनेची चिंता वाढली आहे.

भाजपचे खासदार रामदास तडस अध्यक्ष असलेल्या महाराष्ट्र प्रांतिक तैलीक महासभेचा नाशिक विभागीय पदाधिकारी मेळावा शिर्डी येथे संपन्न झाला. या मेळाव्यासाठी रविवारी सायंकाळी (ता.10) खासदार तडस शिर्डीमध्ये आले होते. या देशात ओबीसी 52 टक्के असून त्यातही तेली समाज तेरा टक्के असल्याने या समाजाला न्याय मिळण्यासाठी आमचा लढा सुरू आहे. ओबीसी आरक्षणा शिवाय निवडणुका घेऊ नये अशी मागणी उपमुख्यमंत्री देवेंद्र फडणवीस यांच्याकडे केली असल्याचे खासदार तडस यांनी सांगितले.

तर शिवसेनेच्या खासदारांमध्ये नाराजी असल्याचे सांगत सेनेचे तब्बल 12 खासदार एकनाथ शिंदे यांना पाठिंबा देणार असल्याचा दावा तडस यांनी केला आहे. विकास कामांसाठी जनतेने निवडून दिले होते. मात्र, तीन वर्षात त्यांच्या मतदारसंघात विकास कामे न झाल्याने या खासदारांमध्ये मोठ्या प्रमाणात नाराजी आहे. विकास, देशाचे संरक्षण आणि हिंदुत्वाच्या मुद्यावर नरेंद्र मोदी यांना साथ देण्यासाठी शिवसेनेचे 12 खासदार लवकरच एकनाथ शिंदे यांना पाठिंबा देणार असल्याचे मोठे वक्तव्य खासदार रामदास तडस यांनी केले आहे.

शिवसेनेच्या 40 आमदारांनी बंडखोरी करत ठाकरे सरकार पाडलं. त्यामुळे उद्धव ठाकरेंना मुख्यमंत्रिपदाचा राजीनामा द्यावा लागला. आता सेनेचे खासदार देखील आमदारांच्याच वाटेनं जात असल्याच्या चर्चा आहेत. विकासकामांच्या मुद्यावरून भाजपसोबत युती करण्याची भूमिका शिवसेनेच्या अनेक खासदारांनी पक्षप्रमुख उद्धव ठाकरेंकडे मांडली असल्याचे शिर्डीचे शिवसेना खासदार सदाशिव लोखंडे यांनी स्पष्ट केलंय. त्यामुळे शिवसेना आमदारांपाठोपाठ आता 12 ते 15 सेना खासदार भाजपसोबत जाण्यास इच्छुक असल्याचे बोलले जात आहे. त्यातच भाजपचे खासदार रामदास तडस यांनीच आता सेना खासदारांच्या नाराजीला दुजोरा देत लवकरच 12 खासदार एकनाथ शिंदे गटाला पाठिंबा देणार असल्याचा दावा केला आहे.

शिवसेनेचे खासदार राहुल शेवाळे, भावना गवळी यांनी अगोदरच भाजपला पाठिंबा देण्याची मागणी केली आहे. पक्षप्रमुख उद्धव ठाकरे यांनी मातोश्रीवर शिवसेना खासदारांसोबत बैठकीचे आयोजन केले आहे. यातील अनेक खासदार भाजपसोबत जाण्याचा आग्रह धरू शकतात. तसे संकेत सेना खासदार लोखंडे यांनी देखील दिले आहेत. त्यातच भाजप खासदाराने शिंदे गटात सामील होणार्‍या शिवसेना खासदारांचा थेट आकडाच सांगीतला आहे. तसे झाल्यास आमदार फुटीच्या धक्क्यातून अद्याप न सावरलेल्या शिवसेनेला आणखी मोठा धक्का बसण्याची शक्यता वर्तवली जात आहे.