शेतकर्‍यांना ‘आवळा’ देऊन उद्योजक मित्रांना ‘कोहळा’ देणारी योजना! मोदी सरकारने दिलेल्या मदतीबद्दल महसूल मंत्री बाळासाहेब थोरातांची टीका
नायक वृत्तसेवा, संगमनेर
पंतप्रधान नरेंद्र मोदी यांनी नाताळच्या दिवशी इव्हेंटबाजी करत 9 कोटी शेतकर्‍यांना 18 हजार कोटी रुपये दिल्याचा मोठ्या थाटात गवगवा केला. दिल्लीत कडाक्याच्या थंडीत एक महिन्यापासून हजारो शेतकरी रस्त्यावर ठाण मांडून बसलेले आहेत. नवीन कृषी कायदे रद्द करावेत ही त्यांची मागणी आहे. परंतु त्या शेतकर्‍यांशी चर्चा करण्याऐवजी आपण शेतकर्‍यांचे किती कैवारी आहेत हे दाखवण्यासाठी इव्हेंटबाजी करत प्रधानमंत्री किसान सन्मान योजनेचे महत्व पटवून देण्याचा प्रयत्न केला. वास्तविक पाहता शेतकर्‍यांच्या खात्यात प्रत्येकी 2 हजार रुपये देण्याची ही योजना म्हणजे शेतकर्‍यांना ‘आवळा’ देऊन आपल्या उद्योजक मित्रांना ‘कोहळा’ देणारी योजना आहे, असे महाराष्ट्र प्रदेश काँग्रेस समितीचे अध्यक्ष व महसूल मंत्री बाळासाहेब थोरात यांनी म्हटले आहे.
पंतप्रधान मोदींच्या शेतकरी संबोधनाचा समाचार घेताना मंत्री थोरात पुढे म्हणाले, प्रधानमंत्री किसान सन्मान योजनेच्या वार्षिक 54 हजार कोटी रुपयांसाठी सरकार कर्ज काढते. शेतकर्‍याला वर्षाला 6 हजार रुपये म्हणजे दिवसाला 17 रुपये आणि महिन्याला 500 रुपये होतात. परंतु 9 कोटी शेतकर्‍यांसाठी 54 हजार कोटी रुपये देणार्‍या मोदी सरकारने 2015 ते 2019 या कालावधीत मूठभर उद्योगपतींचे तब्बल 7 लाख 94 हजार 354 कोटी रुपयांचे कर्ज (जवळपास 8 लाख कोटी रुपये) राईट ऑफ केले. दुसरीकडे मोदी सरकारने पेट्रोल-डिझेलमध्ये आत्तापर्यंत 25 रुपयांची वाढ केली, खतांच्या किंमती वाढवल्या, एमएसपी बंद केली जात आहे, सबसीडी बंद केली. शेतकर्‍यांचा उत्पादन खर्च हेक्टरी 30 हजार रुपये होता त्यात आज मोठी वाढ झालेली आहे. त्यामुळे वर्षाला 6 हजार रुपये दिले तरी 24 हजार रुपयांची तफावत आहे. 2014 च्या निवडणूक प्रचारात यवतमाळ जिल्ह्यातील शेतकर्‍यांशी मोदींनी ‘चाय पे चर्चा’ केली, त्यातील शेतकर्‍यानेही आत्महत्या केली. उद्योगपतींसाठी भरमसाठ सवलती, राईट ऑफ केलेल्या कर्जाची रक्कम पाहता शेतकर्‍यांना दिलेली मदत अत्यंत तुटपुंजी असून शेतकर्‍याला वार्‍यावर सोडून मूठभर उद्योगपतींचे हित साधण्याचेच काम मोदी सरकार करत आहे.
नाताळच्या दिवशी सांताक्लॉज येऊन आपल्या पोतडीतून भेट वस्तू देऊन गोड बातमी देऊन जातो. परंतु याच नाताळच्या मुहूर्तावर पंतप्रधानांनी आंदोलन करणार्‍या देशभरातील करोडो शेतकर्‍यांच्या आनंदावर विरजण टाकले आहे. नवीन कृषी कायद्यांचे पंतप्रधान कितीही ममत्व पटवून सांगत असले तरी शेतकर्‍यांचे त्यातून समाधान होत नाही. कारण भाजप सरकारवर शेतकर्‍यांचा विश्वासच राहिलेला नाही. याआधी त्यांनी दिलेली अशी अनेक आश्वासने हवेतच विरली असल्याने भाजपावर विश्वास ठेवण्यास ते तयार नाहीत. पीक विमा योजनेचे फायदा सांगणार्‍या पंतप्रधान मोदी यांच्या गुजरातमधील भाजप सरकारने सुद्धा ही योजना बंद केली आहे. कारण ही योजना शेतकर्‍यांच्या फायद्याची नसून विमा कंपन्यांचे खिसे भरणारीच आहे. शेतकरी आंदोलनाला देशभरातून पाठिंबा वाढत असून शेतकरीही मागे हटण्यास तयार नाहीत हे दिसताच या आंदोलनावरून लक्ष दुसरीकडे वळवण्यासाठी तसेच नवीन कृषी कायदे किती फायद्याचे आहेत हे वदवून घेण्यासाठी शेतकर्‍यांच्या नावाखाली भाजप कार्यकर्त्यांना सहभागी करुन आज इव्हेंट केला गेला, असेही थोरात म्हणाले.
