संगमनेरात अवैद्य कत्तलखान्यावर पोलिसांचा छापा!  ३४ लाखाचा मुद्देमाल जप्त; स्थानिक गुन्हे शाखेची कारवाई 

वरिष्ठ पोलीस अधिकाऱ्यांच्या सूचनेनुसार स्थानिक गुन्हे शाखेचे पथक सोमवारी शहरात अवैध धंद्यांची माहिती घेत असताना या पथकाला गोपनीय माहिती मिळाली की, शहरातील गल्ली नंबर नऊ मध्ये असणाऱ्या जमजम कॉलनीत हाजी मुदस्सर कुरेशी व नवाज जावेद कुरेशी हे त्यांच्या पत्राच्या गोडाऊनमध्ये काही इसमांच्या मदतीने गोवंश जनावरांची कत्तल करत आहेत. त्यामुळे तपास पथकाने मिळालेल्या माहितीवरून जमजम कॉलनीत छापा टाकला असता त्या ठिकाणी आठ ते नऊ इसम गोवंश जनावरांची कत्तल करतांना मिळून आले. पोलिसांच्या कारवाई दरम्यान संशयित इसम हे आडोशाचा फायदा घेऊन पळून जाण्यात यशस्वी झाले.  स्थानिक गुन्हे शाखेच्या पथकाने या ठिकाणावरून २ हजार ७०० किलो गोमांस, दोन महिंद्रा बोलेरो पिकअप, एक अशोक लेलँड कंपनीचा बडा दोस्त, पाच दुचाकी, चार इलेक्ट्रिक वजन काटे, लोखंडी सुरा व लोखंडी कुऱ्हाड आणि दोन मोबाईल असा तब्बल ३४ लाख ८४ हजार रुपये किंमतीचा मुद्देमाल जप्त केला आहे. पोलिसांनी या प्रकरणी हाजी मुदस्सर कुरेशी रा. संगमनेर (फरार), नवाज जावेद कुरेशी, संगमनेर (फरार), फहीम कुरेशी (पूर्ण नाव व पत्ता माहीत नाही, फरार), अक्रम कुरेशी (पूर्ण नाव पत्ता माहित नाही, (फरार), समीर कुरेशी (पूर्ण नाव व पत्ता माहीत नाही, (फरार) आणि इतर चार ते पाच अज्ञात इसमाविरुद्ध संगमनेर शहर पोलीस ठाण्यात गुन्हा दाखल केला आहे.