शुक्रवारी संगमनेरात पुरस्कार वितरण समारंभ राजस्थानच्या मुख्यमंत्र्यांची राहणार प्रमुख उपस्थिती

नायक वृत्तसेवा, संगमनेर
राजस्थानचे मुख्यमंत्री अशोक गहलोत, माजी मंत्री आमदार छगन भुजबळ, काँग्रेस विधीमंडळ पक्षनेते आमदार बाळासाहेब थोरात यांच्या उपस्थितीत शुक्रवारी (ता. 23) दुपारी 12.30 वाजता शेतकी संघ प्रांगण, यशोधन कार्यालयाशेजारी जयंती महोत्सव पुरस्कार वितरण समारंभाचे आयोजन करण्यात आले असल्याची माहिती आमदार डॉ. सुधीर तांबे व बाजीराव खेमनर यांनी दिली.

जयंती महोत्सव पुरस्कार कार्यक्रमाबाबत माहिती देताना आमदार डॉ. तांबे म्हणाले, यावर्षीचा जयंती महोत्सव हा कोरोना काळामुळे पुढे ढकलण्यात आला होता. हे पुरस्कार वितरण शुक्रवारी राजस्थानचे मुख्यमंत्री अशोक गहलोत यांच्या हस्ते व माजी मंत्री आमदार छगन भुजबळ यांच्या अध्यक्षतेखाली आणि विधीमंडळ पक्षनेते आमदार बाळासाहेब थोरात यांच्या उपस्थितीत शानदार कार्यक्रमात होणार आहे. अमृतवाहिनी शेती व शिक्षण विकास संस्थेच्यावतीने सहकार, साहित्य, समाजसेवा, पर्यावरण या क्षेत्रात उल्लेखनीय कार्याबद्दलचा यावर्षीचा सहकारमहर्षी भाऊसाहेब थोरात स्मृति पुरस्कार ज्येष्ठ साहित्यिक व विचारवंत डॉ. अ. ह. साळुंखे यांना तर कृषी, शिक्षण, समाजसेवा आणि पर्यावरण क्षेत्रातील उल्लेखनीय कार्याबद्दल डॉ. अण्णासाहेब शिंदे स्मृती पुरस्कार पर्यावरण तज्ज्ञ व वनराईचे विश्वस्त डॉ. सुधीर भोंगळे यांना प्रदान करण्यात येणार आहे. याचबरोबर सहकारमहर्षी भाऊसाहेब थोरात सेवाभावी संस्था पुरस्कृत सहकारातील नेतृत्व पुरस्कार राज्याचे माजी मंत्री व मांजरा सहकारी साखर कारखान्याचे अध्यक्ष दिलीप देशमुख यांना प्रदान करण्यात येणार आहे. एक लाख रुपये रोख व सन्मानचिन्ह देऊन या पुरस्कारार्थींचा सन्मान होणार आहे.

जयंती महोत्सवानिमित्त शनिवारी (ता. 24) दुपारी 12.30 वाजता माजी मंत्री आमदार यशोमती ठाकूर यांच्या उपस्थितीत महिला कार्यकर्ता मेळावा व कीर्तन जुगलबंदी होणार आहे. तसेच सायंकाळी 7 वा युवा जल्लोष धमाका हा कार्यक्रम होणार आहे. तर रविवारी दुपारी 12.30 वाजता घे भरारी स्पर्धा परीक्षा तयारी संवाद होणार आहे आणि सायंकाळी 7 वाजता महाराष्ट्रातील लोकप्रिय कार्यक्रम हास्यजत्रा होणार आहे. यावेळी मराठी चित्रपट सृष्टीतील अनेक कलावंत या कार्यक्रमात सहभाग घेणार आहेत. दरम्यान, पुरस्कार निवड समितीत विजय बोर्‍हाडे, उल्हास लाटकर, डॉ. राजीव शिंदे, उत्कर्षा रुपवते, प्राचार्य केशव जाधव, प्रा. बाबा खरात हे सदस्य आहेत. तरी या कार्यक्रमांसाठी संगमनेर तालुक्यातील व अहमदनगर जिल्ह्यातील जास्तीत जास्त नागरिक, महिला व युवकांनी उपस्थित राहावे असे आवाहन सहकारमहर्षी भाऊसाहेब थोरात व डॉ. अण्णासाहेब शिंदे जयंती महोत्सव समिती आणि अमृत उद्योग समूहाच्यावतीने करण्यात आले आहे.