पारनेर सैनिक सहकारी बँकेचे संचालक आढळले दोषी! ज्येष्ठ समाजसेवक अण्णा हजारेंची तक्रार; कारवाईकडे लागले लक्ष

नायक वृत्तसेवा, नगर
पारनेर तालुका सैनिक सहकारी बँकेत 2006 ते 2021 या काळातील संचालक मंडळांच्या गैरव्यस्थापनामुळे बँकेचे नुकसान झाल्याचे चौकशीत आढळून आले आहे. ज्येष्ठ समाजसेवक अण्णा हजारे यांच्यासह बँकेच्या काही सभासदांनी यासंबंधी तक्रार केली होती. त्यानुसार नाशिक विभागीय सहनिबंधक राजेंद्र शाह यांनी चौकशी करून सहकार आयुक्त अनिल कवडे यांना अहवाल पाठविला आहे. त्यानुसार बँकेत कोट्यवधी रुपयांची अनियमितता झाल्याचे आढळून आले आहे. आता संबंधितांवर काय कारवाई होते, याकडे लक्ष लागले आहे.

पारनेर तालुक्यात ही सैनिक सहकारी बँक आहे. सुरुवातीचा काही काळ हजारे यांच्या मार्गदर्शनाखाली बँकेचा कारभार चालत होता. नंतर मात्र, हजारे यांनी स्वत:ला बँकेपासून दूर केले. या बँकेत 2006 ते 2021 या काळात अनियमितता झाल्याचा आरोप आहे. हजारे यांच्यासह सभासद कॅप्टन विट्ठल वराळ, बाळासाहेब नरसाळे, विनायक गोस्वामी, मारुती पोटघन, विक्रमसिह कळमकर यांनी चौकशीची मागणी केली होती. बँकेच्या अधिकार्‍यांनी कर्ज वसूल करताना नियमबाह्य ओटीएस सवलत देणे, अपारदर्शक लिलाव प्रक्रिया राबवणे, अयोग्य दराने सरचार्ज आकारणे, न्यायालयीन खर्चासाठी अवाढव्य वकील फी बँकेत टाकणे, म्युच्युअल फंडात बेकायदेशीर गुंतवणूक करत लाखो रुपयांचे आर्थिक नुकसान करणे, शासकीय रकमेचा अपहार करणार्‍यांना पाठीशी घालणे असे आरोप करण्यात आले होते. नियमबाह्य कार्यपद्धतीमुळे नातेवाईकांची भरती करून सेवेत घेणे, बँकेवर आपलीच सत्ता कायम राहण्यासाठी नियमबाह्य नातेवाईकांना सभासद करणे, गुन्हे दाखल झालेल्या कर्मचार्‍यांना नियमबाह्य अ‍ॅडव्हान्स देणे, जादा अवास्तव वसुली खर्च टाकणे, फर्निचर व शाखा नुतनीकरण खर्च करताना पारदर्शकपणे न करणे, कर्ज वाटप करताना कमी मूल्यांकन तारण घेऊन जादा रक्कम कर्ज वाटप करणे, आधिकारी यांनी बँक निधीचा दुरुपयोग करत व कर्जाची सुरक्षितता न पाहता कर्ज वाटप करून बँकेच्या हिताला बाधा आणली गेली. त्यामुळे बँकेचे या काळातील पदाधिकारी, संचालक, मुख्य कार्यकारी अधिकारी, अधिकारी यांची चौकशी करण्याची मागणी करण्यात आली होती. त्यानुसार सहकार आयुक्त अनिल कवडे यांनी नाशिक विभागीय सहनिबंधक राजेंद्र शाह यांना चौकशी करून अहवाल सादर करण्याचा आदेश दिला होता. त्यानुसार शाह यांनी व त्यांच्या पथकाने तपासणी केली. त्याचा अहवाल त्यांनी सादर केला आहे.

याबाबत मिळालेल्या माहितीनुसार या अहवालात मुख्य कार्यकारी आधिकारी संजय कोरडे यांच्यासह संबंधित सर्व पदाधिकारी आणि संचालकांवर ठपका ठेवण्यात आला आहे. अधिकार्‍यांनी नियमबाह्य कामकाज केले आहे. तर संचालक मंडळाने कर्तव्यात सतत हेतुपूर्वक कसूर, निष्काळजीपणा करत कोट्यावधी रुपयांचे बँकेचे नुकसान केले असल्याचे अहवालात नमूद करण्यात आले आहे. यासंबंधी तक्रारदार सभासदांनी सांगितले की, सैनिक बँकेतील घोटाळ्याची विभागीय सहनिबंधक यांनी चौकशी केली असता जवळ जवळ पाच कोटी रक्कम तीन संचालक मंडळाकडून व मुख्य कार्यकारी अधिकारी यांच्याकडून वसूल पात्र निघणार आहे. पूर्ण सखोल लेखा परीक्षण केल्यास चाळीस कोटींपेक्षा जादा रक्कम जाऊ शकते. त्यामुळे हे संचालक मंडळ बरखास्त करावे व प्रशासक मंडळ सहकार आयुक्तांनी नियुक्त करण्यात यावे, अशी मागणी बाळासाहेब नरसाळे, विनायक गोस्वामी यांनी केली आहे.