‘अखेर’ डॉ.योगेश निघुते पोलिसांना शरण! डॉ.पूनम निघुते आत्महत्या प्रकरण; अटकपूर्व जामीनअर्ज घेतला मागे..
नायक वृत्तसेवा, संगमनेर
संपूर्ण जिल्ह्याच्या वैद्यकीय क्षेत्रात खळबळ उडवून देणार्या डॉ.पूनम योगेश निघुते आत्महत्या प्रकरणातील संशयीत आरोपी व त्यांचा पती डॉ.योगेश निघुते अखेर आज पोलिसांना शरण आला. संगमनेरच्या अतिरीक्त जिल्हा व सत्र न्यायालयाने त्याचा अटकपूर्व जामीनाचा अर्ज फेटाळल्यानंतर त्याने उच्च न्यायालयाच्या औरंगाबाद खंडपीठात धाव घेतली होती. मात्र तेथेही सरकारी पक्षाने जोरदार युक्तिवाद करीत वस्तुस्थितीजन्य पुरावे सादर करीत त्याच्या जामीनाला विरोध केला. त्यावरुन आपल्याला दिलासा मिळणार नसल्याची कल्पना येताच त्याने आपला अर्ज मागे घेत आज (ता.21) सकाळी शहर पोलिसांसमोर शरणांगती पत्करली. दुपारी 11 वाजता त्याला न्यायालयासमोर उभे केले जाणार आहे.
दोन महिन्यांपूर्वी 29 ऑगस्टरोजी संगमनेरातील सर्वपरिचित असलेला बालरोगतज्ज्ञ डॉ.योगेश निघुते याची पत्नी पूनम यांनी आपल्या राहत्या घरातच पंख्याला ओढणीच्या सहाय्याने गळफास घेवून आत्महत्या केली होती. या घटनेनंतर जिल्ह्यातील वैद्यकीय क्षेत्रात खळबळ उडण्यासह विविध चर्चाही रंगल्या होत्या. जालना येथील माहेर असलेल्या डॉ.पूनम यांनीही संगमनेरात आल्यानंतर आपली मुलगी आत्महत्येसारखे पाऊल उचलणार नसल्याचा विश्वास व्यक्त करतांना घातपाताचा संशय व्यक्त करीत मृत पूनमचे शवविच्छेदन औरंगाबादच्या घाटी रुग्णालयात करण्याची मागणी केली होती. त्यानुसार पोलिसांनी त्यांचा मृतदेह घाटी रुग्णालयात पाठविला होता.
यादरम्यान डॉ.योगेश निघुते याने संगमनेरच्या अतिरीक्त जिल्हा व सत्र न्यायालयात अटकपूर्व जामीनासाठी अर्ज दाखल केला. त्यावरील सुनावणीच्यावेळी न्यायालयात नाट्यमय घटना घडल्याने मृत डॉ.पूनमच्या भावाने सरकारी वकीलांवरच आक्षेप घेतला. या सुनावणीत घाटी रुग्णालयाचा शवविच्छेदन अहवाल अप्राप्त असल्याचे सांगत 18 सप्टेंबरपर्यंत आरोपीला अटक करणार नसल्याचे तपासी अधिकारी, पोलीस उपनिरीक्षक पंकज शिंदे यांनी न्यायालयात सांगितले. त्यानुसार न्यायालयाने डॉ.योगेश याला 18 सप्टेंबरपर्यंत अटकेपासून संरक्षण दिले होते. मात्र त्यानंतर झालेल्या सुनावणीत सरकारी पक्षाने सबळ पुरावे सादर करीत त्याच्या जामीनाला विरोध केल्याने तो ग्राह्य धरुन न्यायालयाने त्याचा अटकपूर्व जामीनअर्ज फेटाळला. त्यामुळे त्या विरोधात त्याने औरंगाबाद खंडपीठात धाव घेतली होती.
बुधवारी (ता.20) त्याच्या अटकपूर्व जामीनावर सविस्तर सुनावणी झाली. यावेळी बचावपक्षाने डॉ.पूनम यांच्या आत्महत्या प्रकरणात डॉ.योगेश याचा थेट संबंध नसल्याचा युक्तिवाद करीत बचाव करण्याचा प्रयत्न केला. मात्र सरकारी पक्षाने घाटी रुग्णालयाचा शवविच्छेदन अहवाल, डॉ.पूनम यांनी आत्महत्या करण्यापूर्वी त्या दोघात झालेली भांडणे व त्याचे सीसीटीव्ही फूटेज, दोघात झालेल्या संभाषणाची ऑडियो क्लिप असे सबळ पुरावे सादर करीत आरोपीला जामीन मिळाल्यास पुराव्यांशी छेडछाड होण्यासह साक्षीदारांवर दबाव आणला जाण्याची भिती व्यक्त केली. न्यायालयात झालेल्या जोरदार युक्तिवादावरुन आपला जामीनअर्ज मंजूर होणार नसल्याची पूर्वकल्पना येताच बुधवारी सायंकाळी डॉ.योगेश निघुते याने आपला अटकपूर्व जामीनअर्ज मागे घेतला.
आज (ता.21) सकाळी त्याने थेट संगमनेर शहर पोलीस ठाणे गाठले व आपण आत्मसमर्पण करीत असल्याचे पोलिसांना सांगितले. त्यानुसार पोलिसांनी त्याची वैद्यकीय तपासणी करुन सकाळी आठ वाजण्याच्या सुमारास त्याला अटक केली आहे. आज दुपारी 11 वाजता त्याला न्यायालसासमोर उभे केले जाणार असून पोलिसांकडून त्याच्या पोलीस कोठडीची मागणी केली जाणार आहे. गेल्या दोन महिन्यांपासून आपली अटक टाळण्यासाठी न्यायालयाचे उंबरे झिझवणारा डॉ.योगेश निघुते अखेर गजाआड गेल्याने डॉ.पूनम यांच्या नातेवाईकांनी समाधान व्यक्त केले आहे.
